sulmi ne xhami, onenewspage
Policia izraelite sulmoi kompleksin e xhamisë al-Aksa në Jeruzalemin Lindor të dielën, me të paktën 10 persona të plagosur gjatë përleshjeve që pasuan, njofton “Xinhua”.
Herët të dielën, forcat e policisë izraelite shpërndanë palestinezët nga sheshi i madh jashtë xhamisë, ndërsa dhjetëra mbetën brenda dhe brohoritën "Zoti është i madh", sipas një deklarate të lëshuar nga policia.
Policia njoftoi se ata hynë në kompleks për të pastruar gurët dhe barrierat e tjera të grumbulluara nga palestinezët gjatë natës në trotuarin e përdorur nga hebrenjtë për të vizituar vendin.
“Policia është e angazhuar për të lehtësuar lirinë e adhurimit për hebrenjtë dhe myslimanët”, -thuhet në deklaratë.
Pak më vonë, palestinezët raportuan përleshje jashtë xhamisë, në të cilat të paktën dhjetë persona u plagosën nga forcat izraelite të sigurisë, sipas një deklarate të lëshuar nga Gjysmëhëna e Kuqe Palestineze.
Sipas policisë izraelite, përleshjet filluan pasi palestinezët brenda xhamisë hodhën fishekzjarre në shesh.
Për më tepër, të dielën në Jeruzalemin Lindor, palestinezët hodhën gurë mbi autobusët në rrugë për në Qytetin e Vjetër, ku ndodhet kompleksi i xhamisë al-Aksa. Shërbimi shëndetësor i urgjencës i Izraelit njoftoi në një deklaratë se të paktën pesë hebrenj u plagosën lehtë, duke përfshirë një djalë 14-vjeçar dhe shoferin e autobusit. Dy të dyshuar palestinezë u arrestuan për gjuajtjen e gurëve, njoftoi policia.
Kompleksi i Xhamisë Al-Aksa është një vend i shenjtë për myslimanët dhe hebrenjtë. Ndodhet në Jeruzalemin Lindor, një territor i pushtuar nga Izraeli së bashku me pjesën tjetër të Bregut Perëndimor në luftën e Lindjes së Mesme të vitit 1967. Izraeli e aneksoi atë pak më vonë në një veprim që nuk njihet nga shumica e komunitetit ndërkombëtar.
