I dërguari kinez paralajmëron për pasojat e sanksioneve pa dallim lidhur me konfliktin në Ukrainë

I dërguari kinez në OKB paralajmëroi se sanksionet pa dallim lidhur me konfliktin në Ukrainë do të sjellin probleme të reja humanitare.

“Sanksionet e përshkallëzuara gjithëpërfshirëse dhe pa dallim kanë goditur energjinë globale, ushqimin, ekonominë, tregtinë, tregjet financiare dhe do të vazhdojnë ta bëjnë këtë, duke ndikuar në jetën e publikut të gjerë dhe duke shkaktuar probleme të reja humanitare”, -deklaroi Dai Bing, zëvendëspërfaqësuesi i përhershëm i Kinës në Kombet e Bashkuara, në një takim të Këshillit të Sigurimit mbi situatën humanitare në Ukrainë, raporton “Xinhua”.

Vendet në zhvillim, të cilat përbëjnë shumicën e botës, nuk janë palë në këtë konflikt dhe nuk duhet të tërhiqen në konfrontim dhe të detyrohen të vuajnë pasojat e përplasjeve gjeopolitike dhe grindjeve midis fuqive të mëdha, tha ai. Sipas tij, tani për tani, siguria globale e ushqimit po sfidohet seriozisht, gjë që kërkon vëmendjen e duhur. Sanksionet dhe bllokadat ekonomike vetëm do të përkeqësojnë artificialisht mungesën e ushqimit dhe shtrembërimet e çmimeve, do të prishin më tej prodhimin e ushqimit dhe zinxhirin e furnizimit me ushqim në të gjithë botën, do të rrisin çmimet e ushqimit dhe do të ngarkojnë vendet në zhvillim, tha Dai.

"Ne bëjmë thirrje për një koordinim të zgjeruar ndërkombëtar për të stabilizuar furnizimin me ushqime dhe çmimet e ushqimit, për t'u përmbajtur nga kufizimet e pajustifikuara të eksportit, për të mbajtur tregun të funksionojë në një mënyrë të qëndrueshme dhe për të garantuar sigurinë globale të ushqimit", -theksoi përfaqësuesi kinez në OKB.

Ai sugjeroi që Kombet e Bashkuara, Programi Botëror i Ushqimit, Organizata e Ushqimit dhe Bujqësisë, Organizata Botërore e Tregtisë dhe agjencitë e tjera duhet të kontribuojnë në mënyrë aktive në koordinimin e prodhimit dhe tregtisë së ushqimit midis vendeve dhe për të ndihmuar vendet në zhvillim të përballojnë këtë situatë. (Irma)