Shoqata Botërore e Mjekësisë ka bërë thirrje për përdorimin e gjerë të vaksinave përforcuese kundër Covid 19, ndërsa në Gjermani po zhvillohet një debat se si të vaksinohen miliona njerëz të cënueshëm përpara se të fillojë dimri.
Frank Ulrich Montgomery, mjeku gjerman që kryeson shoqatën, tha për gazetat e grupit mediatik “Funke” se të gjithë ata që janë vaksinuar plotësisht gjashtë muaj më parë duhet të marrin një vaksinë përforcuese së shpejti.
Ai vuri në dukje se një fushatë e re, e centralizuar vaksinimi ishte e nevojshme në Gjermani, këtë vjeshtë, një fushatë që duhet të promovojë dy dozat e vaksinave kundër Covid-19 për të pavaksinuarit, si edhe ato përforcuese.
“Për shkak se mbrojtja imune bie pas gjashtë muajsh, ne si shoqëri duhet të kemi interes që kjo mbrojtje të mbetet e qëndrueshme”, -pohoi Montgomery.
Organi më i lartë për administrimin e vaksinave në Gjermani njoftoi se po punon intensivisht nëse do të rekomandojë një raund të tretë të vaksinimit për të gjithë. (Elona)
