vaksinimet ne Shqiperi, foto Ministria e Shendetesise
Ministria e Shëndetësisë dhe Mbrojtjes Sociale informoi se deri tani në Shqipëri janë kryer mbi 2.4 milionë vaksinime në total. Vetëm të mërkurën u kryen më shumë se 11 mijë vaksinime.
Vaksinimi anti-Covid vijon në të gjitha pikat e përqendruara të vaksinimit, në qendrat shëndetësore, poliklinika si dhe nëpërmjet njësive të lëvizshme në komunitet në kuadër të aksionit kombëtar “derë më derë”. Fushata është e hapur për të gjithë personat +16 vjeç si dhe fëmijët +12 vjeç me probleme të sistemit imunitar.
Trendi më i lartë i vaksinimit është kryesisht te moshat e treta, ato të cilat zënë edhe përqindjen më të lartë të të vaksinuarve. Sipas të dhënave nga autoritetet shëndetësore nga mosha 18 deri në 25 vjeç janë vaksinuar me një dozë vetëm 29.1% e tyre, ndërsa përqindjen më të lartë e ka grupmosha 70-79 vjeç me 74.2%.
Sa i përket dozës së dytë, shifrat e vaksinimit të moshave nga 18 deri 50 vjeç janë më të ulëta, krahasuar me moshat mbi 60 vjeç.
Të dhënat për fëmijët mbi 16 vjeç të vaksinuar flasin për një shifër deri në 46% të tyre me të dyja dozat. (Irma)
