66 vjet pas anëtarësimit në OKB Shqipëria nisi më 1 janar mandatin dyvjeçar në Këshillin e Sigurimit të OKB-së. Zgjedhja e Shqipërisë si anëtare jo e përhershme e Këshillit të Sigurimit në Kombet e Bashkuara, është një prej arritjeve më të mëdha në diplomacinë ndërkombëtare të vendit.
Kombet e Bashkuara (VCG)
Kombet e Bashkuara (VCG)
Ministrja për Europën dhe Punëve të Jashtme, Olta Xhaçka theksoi se vendi ynë do të kontribuojë në adresimin e çështjeve më të nxehta të sigurisë në botë.
“Që sot ekipi ynë i diplomatëve në Nju Jork do të ketë të drejtën të marrë pjesë në mbledhjet e Këshillit të Sigurimit si një anëtar jo permanent, do të ketë të drejtën të prezantojë qëndrimet e Shqipërisë për adresimin e çështjeve më të nxehta të sigurisë në botë. Do të ketë privilegjin të influencojë me forcën e ideve dhe eksperiencës sonë diskutimet mbi kërcënimet më të mprehta që rrezikojnë sot paqen e stabilitetin. Ky mandat nuk është një dhuratë që i ra Shqipërisë nga qielli. Kjo është një arritje për të cilën duhet të ndihet krenar çdo shqiptar kudo në botë.”
Ministrja për Evropën dhe Punët e Jashtme, Olta Xhaçka shtoi se shumë vjet më parë, kur u mor për herë të parë vendimi për të filluar procesin e lobimit për një vend në Këshillin e Sigurimit, gjithçka dukej si një ëndërr e pamundur. E çmendur madje. Por ja ku jemi sot dhe ajo që dukej e pamundur sot është realitet.
Ministrja e Jashtme Olta Xhaçka)
“Unë besoj që kjo është prova më e mirë, që kur ne shqiptarët vendosim të punojmë, të gjithë së bashku, me durim, me përkushtim, për ne nuk ka asgjë të pamundur. Le t’i qasemi 2022 e sfidave që na presin me po këtë frymë e po këtë vendosmëri dhe nuk kam asnjë dyshim që e ardhmja që do të ndërtojmë së bashku për familjet e fëmijët tanë do të jetë vërtet e bukur”, tha ministrja për Evropën dhe Punët e Jashtme, Olta Xhaçka.
Shqipëria u pranua anëtare e OKB-së në 14 dhjetor 1955 dhe pas 66 vitesh anëtarësie, u votua për herë të parë për të qenë anëtare e përkohshme e Këshillit të Sigurimit të OKB për një mandat 2-vjeçar. Mandati fillon më 1 janar 2022. Ky këshill përbëhet nga 15 anëtarë, ku SHBA, Mbretëria e Bashkuar, Franca, Rusia dhe Kina janë 5 anëtare të përhershme kurse 10 vendet e tjera anëtare janë me një mandat dyvjeçar.
Ndër prioritetet e mandatit të Shqipërisë në Këshillin e Sigurimit do të jenë :Respektimi i të drejtave të gruas, si kontribut për paqe dhe siguri të qëndrueshme; Respektimi i të drejtave të njeriut dhe i ligjit ndërkombëtar; Lufta kundër ekstremizmit të dhunshëm dhe terrorizmit; Ndryshimet e klimës dhe lidhjet e tyre me rreziqet ndaj sigurisë globale; Metodat e punës të Këshillit të Sigurimit.
Shtetet e Bashkuara të Amerikës përshëndetën marrjen nga Shqipëria të mandatit të anëtarit jo të përhershëm në Këshillin e Sigurimit të OKB-së.
Kryeministri Edi Rama në OKB (Gazeta Koha Jonë)
“Urime Shqipërisë për një arritje të jashtëzakonshme, fillimin e anëtarësimit të saj në Këshillin e Sigurimit të Organizatës së Kombeve të Bashkuara, për herë të parë në histori. Shtetet e Bashkuara mirëpresin të shërbejnë së bashku me Shqipërinë në Këshillin e Sigurimit të OKB-së, për të trajtuar sfidat më të ngutshme me të cilat përballet sot bota jonë”, deklaroi sot ambasada amerikane në Tiranë.
Më 11 qershor 2021 Shqipëria u zgjodh anëtare jo e përhershme e Këshillit të Sigurimit për periudhën 2022-2023 duke shënuar një ditë historike. Shqipëria ishte vendi i vetëm nga ata që ishin në garë që nuk kishte qenë asnjëherë anëtare e Këshillit të Sigurimit. Me 175 vota nga 117 të nevojshme, Shqipëria u zgjodh anëtare e Këshillit të Sigurimit të OKB për vitet 2022-2023. Zgjedhja në Këshillin e Sigurimit, për herë të parë pas 66 vitesh anëtarësim në OKB, përfaqëson sfidë madhore, por dhe një mundësi të shkëlqyer për Shqipërinë.
Shqipëria nis mandatin në KS të OKB (Reforma)
Përfaqësuesja e Përhershme e Shqipërisë në OKB, ambasadorja Besiana Kadare, njëkohësisht zv/presidente e seancës së 75-të të Asamblesë së Përgjithshme të Kombeve të Bashkuara në një intervistë për ATSH-në me rastin e zgjedhjes së Shqipërisë si anëtare e përkohëshme në KS të Kombeve të Bashkuara theksoi se numri i lartë i vendeve anëtare të OKB-së që i dhanë votën (e fshehtë) Shqipërisë për t’u anëtarësuar në organin më të rëndësishëm dhe të lakmuar të OKB-së, dëshmon seriozitetin dhe konstruktivitetin e politikës sonë të jashtme.
“Rezultatet e votimit në Asamblenë e Përgjithshme treguan se Shqipëria gëzon një reputacion pozitiv dhe konsiderohet nga familja e madhe e kombeve si një partner i besueshëm dhe i përgjegjshëm, i aftë që të angazhohet në zgjidhjen e krizave dhe konflikteve globale”, u shpreh ambasadorja për ATSH-në.
Prestigji dhe influenca që fiton një vend duke u anëtarësuar në Këshillin e Sigurimit, sipas Kadaresë, “e tejkalon ndjeshëm peshën dhe fuqinë e tij politike tradicionale, të përcaktuar zakonisht nga përmasat gjeografike, popullsia dhe fuqia e tij ekonomike dhe ushtarake”.
Kombet e Bashkuara (VCG)
Ambasadorja e Shqipërisë në OKB informoi për ATSH-në se, “gjatë mandatit të saj, Shqipëria do të përfshihet në negociata me fuqitë më të mëdha botërore dhe do të marrë pjesë në vendimmarrje që lidhen me paqen dhe sigurinë e planetit. Miratimi i çdo rezolute në KS kërkon të paktën 9 vota pro, dhe mosvënien e vetos nga asnjëri prej 5 anëtarëve të përhershëm. Në këtë kontekst, nuk është e vështirë të kuptohet se sa rol të rëndësishëm do të marrë Shqipëria, e cila, me qëndrimet që do të mbajë në Këshill të Sigurimit, do të influencojë vendimmarrjen për çështje globale”.
Si rrjedhojë, shtoi ajo, periudha dyvjeçare e anëtarësisë sonë në Këshillin e Sigurimit (2022-2023) do t’i japë Shqipërisë dhe politikës së saj të jashtme vizibilitetin më të madh që shteti shqiptar ka njohur ndonjëherë në arenën ndërkombëtare.
Shqipëria u paraqit si kandidaturë konsensuale e Grupit të Vendeve të Evropës Lindore. Veprimtaria e Këshillit të Sigurimit në Kombet e Bashkuara ka prioritet paqen dhe sigurinë ndërkombëtare.
Këshilli i Sigurimit në OKB është ndër organet më të rëndësishme të Organizatës së Kombeve të Bashkuara, që ka për detyrë mirëmbajtjen e paqes dhe sigurisë në mes të kombeve.
Eda Merepeza