Foto:VCG
Zyra e Komisionarit të Ministrisë së Jashtme të Kinës në Rajonin e Posaçëm Administrativ të Hong-Kongut (HKSAR) ka kundërshtuar dhe dënuar me vendosmëri deklaratën e bërë nga ministrat e jashtëm të disa vendeve për zgjedhjet e Këshillit të 7-të Legjislativ të HKSAR-it.
Ministrat e jashtëm të Shteteve të Bashkuara, Britanisë, Australisë, Kanadasë dhe Zelandës së Re njollosën sistemin e ri zgjedhor të Hong-Kongut, vunë në dyshim autoritetin e rezultateve të zgjedhjeve, u dhanë zemër elementëve antikinezë në Hong-Kong dhe ndërhynë në punët e brendshme të Kinës, tha një zëdhënës i Zyrës të hënën.
Libri i bardhë i titulluar "Hong-Kong: Përparimi demokratik në kuadrin e parimit ‘Një vend, dy sisteme’," i publikuar nga Zyra e Informacionit e Këshillit të Shtetit të Kinës të hënën, vëren qartë se qeveria kineze projektoi, krijoi, mbrojti dhe çoi përpara sistemin e demokracisë së Hong-Kongut, u shpreh zëdhënësi.
"Sistemi zgjedhor i përmirësuar nga qeveria qendrore tregon se demokracia në Hong-Kong po përparon me kohën dhe hedh një themel të fortë për zhvillimin e shëndetshëm dhe afatgjatë të demokracisë në Hong-Kong," tha ai.
Ligjvënës të sapozgjedhur, Hong Kong(VCG)
Qytetarë votojnë, Hong Kong(VCG)
Zëdhënësi theksoi më tej se, sipas sistemit të ri zgjedhor, zgjedhjet për Këshillin Legjislativ vunë në jetë misionin e vet origjinal për të zgjedhur të aftët dhe për t'u shërbyer njerëzve, minimizuan përçarjet e brendshme e mbarëpolitizimin dhe pasqyruan kërkesën e opinionit publik të Hong-Kongut për qëndrueshmëri dhe zhvillim, duke çelur një epokë të re të demokracisë cilësore në Hong-Kong.
Ai vuri në dukje më tej se qeverisja nga patriotët është një etikë politike e përbashkët dhe sigurimi i ndjenjës së identitetit kombëtar dhe besnikërisë politike të mbajtësve të posteve publike është një praktikë e zakonshme ndërkombëtare, duke shtuar se sistemi i ri zgjedhor karakterizohet nga një gjithëpërfshirje e larmi e madhe dhe u shërben interesave themelore të banorëve të Hong-Kongut.
“Ne u bëjmë thirrje politikanëve në vendet përkatëse të respektojnë prirjen historike të kohës, të zbatojnë parimet e së drejtës ndërkombëtare si mosndërhyrja në punët e brendshme të të tjerëve e normat bazë që rregullojnë marrëdhëniet ndërkombëtare, dhe të ndalojnë ndërhyrjen e çfarëdo forme në çështjet e Hong-Kongut dhe punët e brendshme të Kinës”, u shpreh zëdhënësi i Zyrës e Komisionarit të Ministrisë së Jashtme kineze në Hong-Kong.(Artan)
