Vaksina eksperimentale COVID-19 e zhvilluar nga “Sinovac Biotech” e Kinës mund të shkaktojë përgjigje të shpejtë të antitrupave dhe është e përshtatshme për përdorim urgjent, sipas rezultateve paraprake të provave të botuar të mërkurën në revistën prestigjoze mjekësore “The Lancet” për sëmundjet infektive.
Zbulimet e “Sinovac”-ut u mundësuan nga rezultatet e provave klinike të Fazës I dhe II në Kinë ku morën pjesë mbi 700 vullnetarë.
"Gjetjet tona tregojnë se CoronaVac është në gjendje të shkaktojë një përgjigje të shpejtë të antitrupave brenda katër javësh nga imunizimi me dy doza vaksine në një interval 14-ditor," tha një nga autorët e publikimit, Zhu Fengcai.
Sipas studiuesve, gjetjet e reja nga testimit i Fazës III, do të ishin thelbësore për të përcaktuar nëse përgjigjja imune e gjeneruar nga “CoronaVac” ishte e mjaftueshme për të mbrojtur njerëzit nga virusi i koronavirusit.
“Sinovac” aktualisht po zhvillon tre prova klinike të Fazës III, në Indonezi, Brazil dhe Turqi.
“CoronaVac” është një nga tre vaksinat eksperimentale COVID-19 që Kina ka përdorur për të vaksinuar qindra mijëra njerëz nën një program emergjent.
Dy vaksinat e tjera të programit, të dyja të zhvilluara nga institutet e lidhura me “Sinopharm” dhe një vaksinë tjetër nga “CanSino Biologics”, janë gjithashtu të sigurta dhe shkaktuan përgjigje imune në provat e hershme dhe të fazës së mesme, sipas vlerësimeve nga kolegët.
Gang Zeng, një studiues i përfshirë në studimin e “CoronaVac”, tha se vaksina mund të ruhet në temperaturat nga 2 deri në 8 gradë celsius për deri në tre vjet.
"Kjo gjë do të ofrojë disa përparësi për shpërndarjen në rajone ku qasja ndaj të ftohtit është sfiduese," tha studiuesi. (Albana)
