Kalendari tradicional kinez hënor e ndan vitin në 24 terma diellorë. Fillimi i verës, mandati i 7-të i vitit, fillon më 5 maj dhe përfundon më 21 maj të këtij viti.
Fillimi i verës sinjalizon kalimin e stinëve. Në këtë ditë, rrezet e diellit arrijnë një kënd prej 45 gradë me tokën. Temperatura do të rritet me shpejtësi gjatë kësaj periudhe, por në veri të Kinës moti mbetet i butë, jo tropikal.
Këtu janë pesë gjëra për të mësuar për fillimin e verës
foto nga VCG
Fillimi i Verës
Termi “Fillimi i Verës” u krijua në fund të Periudhës së Shteteve ndërluftuese (239 para erës sonë). Duke qenë se është një kohë vendimtare për korrjen e kulturave verore si gruri dhe kanola, perandorët e lashtë kinezë në dinastitë e ndryshme i kushtonin rëndësi të madhe Fillimit të Verës.
Në dinastinë Zhou (1050-221 para erës sonë), perandori i udhëhoqi zyrtarët e tij për të organizuar një rit mirëseardhjeje për Fillimin e Verës dhe i inkurajoi banorët që të shfrytëzonin kohën kyçe për të bërë punë në fermë. Thuhet se shumica e dekorimeve ishin rregulluar në ngjyrën e kuqe, duke përfshirë veshjen e perandorit dhe të zyrtarëve, varëset prej nefriti, kuajt dhe flamujt, në mënyrë që të tregonin respekt për perëndinë e verës dhe të luteshin për një korrje të mirë.
Kontrollimi i peshës
Zakoni i peshimit të njerëzve në fillim të verës e ka origjinën nga periudha e tre mbretërive (220-180) dhe mbizotëron sot në Kinën Jugore. Besohej se kjo praktikë do t'u sillte shëndet dhe fat njerëzve të peshuar.
Pas drekës në ditën e fillimit të verës, njerëzit varnin një stol ose shportë që mbahej nga një tra. Të rinjtë dhe të moshuarit peshoheshin me radhë, ndërsa personi që llogariste peshën thoshte urime dhe fjalë për mbarësi. Thuhet se ata që peshoheshin do të qëndronin të shëndetshëm në verën e nxehtë dhe ata që nuk peshoheshin do të vuanin nga sëmundjet.
foto nga VCG
Ngrënia e vezëve
Në Kinën e lashtë, njerëzit besonin se një vezë e rrumbullakët simbolizonte një jetë të lumtur dhe ngrënia e vezëve në ditën e fillimit të verës ishte një lutje për shëndet të mirë. Ata vendosën çajin e mbetur së bashku me vezët dhe u krijua "veza e çajit" origjinale. Më vonë njerëzit përmirësuan metodat e gatimit dhe shtuan erëza në vezë për t'i bërë ato më të shijshme. Sot veza e çajit është bërë një element i kulinarisë tradicionale në Kinë.
foto nga VCG
Konkurse me vezë
Siç thotë një thënie e vjetër kineze "varja e një veze në gjoksin e fëmijëve mund të parandalojë sëmundjet e verës". Sipas traditës, prindërit përgatisin vezë të ziera dhe i vendosin në një qese, përpara se t'i varin në gjoksin e fëmijës së tyre.
Kur janë në shkollë, fëmijët mblidhen së bashku për të luajtur me vezë, duke i përplasur vezët e njëri-tjetrit dhe fiton ai që nuk i thyhet veza.
Kujdesi për zemrën
Sipas mjekësisë tradicionale kineze, fillimi i verës është një kohë kyçe për shëndetin e zemrës. Kur temperature rritet, lagështia dhe nxehtësia mund të ndikojnë në shëndetin e njeriut. Rekomandohet shumë ushqim i pasur me vitamina dhe i freskët. Perimet, si kastraveci, domatet, lakrat dhe selino si dhe frutat si shalqiri, dardhat dhe luleshtrydhet të përbëjnë ushqimet kryesore gjatë verës.
