Konsulenti për çështjet e Azi-Paqësorit dhe komentatori gjeopolitik, Thomas W. Pauken II, vjen me një analizë të suksesit të nismës “Një Brez një Rrugë”. Në opinionin e tij të botuar në “CGTN” me titull “Nisma “Një brez, një rrugë” është ende e fortë dhe më shumë lajme të mira do të vijnë”, Pauken thotë se Ekspozita e 6-të Ndërkombëtare e Rrugës së Mëndafshit, e mbajtur këtë javë në Xi’an dhe që tërhoqi pjesëmarrës nga mbi 70 vende dhe rajone, është një dëshmi për suksesin e kësaj nisme.
Foto:VCG
Qyteti i Xi'an, kryeqendra e provincës Shaanxi në Kinën veriperëndimore, priti këtë javë Ekspozitën e 6-të Ndërkombëtare të Rrugës së Mëndafshit, për të nxjerrë në pah historinë e mahnitshme të suksesit të nismës kineze “Një brez, një rrugë”. Qeveria kineze mbetet e përkushtuar ndaj kësaj nisme së bashku me partneritetet e saj që po përfshijnë rrjetet e Rrugës së Re të Mëndafshit.
Megjithëse ekonomia globale po shkon drejt erërave serioze këtë vit dhe vitin e ardhshëm, Kina është ende një shtytës kryesor i rritjes për kompanitë shumëkombëshe dhe ndërkombëtare. Shumë prej tyre shpresojnë të hyjnë në nismën e “Një brez, një rrugë” në kërkim të mundësive më të mëdha.
Prandaj, ekspozita në Xi'an ka tërhequr pjesëmarrës nga mbi 70 vende dhe rajone, gjë që tregon gjithashtu se fuqitë perëndimore, Shtetet e Bashkuara, Mbretëria e Bashkuar dhe Bashkimi Evropian, kanë ngecur në përpjekjet e tyre për të frenuar Kinën në skenën botërore.
Ka një zhvendosje të re gjeopolitike nga një botë unipolare në një botë shumëpolare dhe kjo po e vendos Kinën dhe vendet nga tregjet në zhvillim në pozita më të forta, pasi shumë prej tyre janë kaq të pasura me burime natyrore.
Shifrat në rritje të tregtisë
Nisma “Një brez, një rrugë” ka dëshmuar të jetë shumë e suksesshme. Li Fei, ndihmës i ministrit të Tregtisë së Kinës, i tha agjencisë së lajmeve “Xinhua” se nga viti 2013 deri në vitin 2021, vëllimi i përgjithshëm i tregtisë së mallrave midis Kinës dhe vendeve të nismës kishte arritur gati 11 trilionë dollarë amerikanë, ndërsa investimi i dyanshëm i ka kaluar 230 miliardë dollarë.
Në fund të vitit 2021, Kina krijoi 79 zona për bashkëpunim ekonomik dhe tregtar në 24 vende, që çuan në investime në mbi 43 miliardë dollarë, si dhe në krijimin e më shumë se 346,000 vendeve të punës.
Numrat flasin vetë, por kjo histori ka shumë më tepër. Nisma “Një brez, një rrugë” është një ndryshim i vërtetë i lojës jo vetëm për Kinën, por për vendet në zhvillim që janë shumë të etura për të ndjekur zhvillimin e shpejtë dhe për të përshpejtuar përpjekjet e tyre të industrializimit, urbanizimit dhe modernizimit.
Komunitetet e varfra meritojnë mundësi për të çrrënjosur varfërinë dhe këtë mund ta arrijnë më së miri duke ndërtuar infrastrukturë jetike.
Megjithatë, shumë vendeve në zhvillim u mungon kapitali, mekanizmat financiarë, pajisjet dhe ekspertët e mjaftueshëm për të ecur përpara në planet për ndërtimin e infrastrukturës që mund të hapë rrugën për hapjen e më shumë fabrikave, ndërtesave të zyrave dhe dyqaneve me pakicë.
Prandaj, Kina ka krijuar AIIB (Banka Aziatike e Investimeve në Infrastrukturë) për të ofruar metoda më të lehta financimi për anëtarët e nismës.
Është gjithashtu e rëndësishme të kihet parasysh se mbajtja e ekspozitës në Xi'an ka një rëndësi të jashtëzakonshme historike dhe kulturore. Megaqyteti kinez, me popullsi rreth 13 milionë banorë, u themelua mbi 1300 vjet më parë, i njohur më parë si Chang'an (Çan an) dhe kryeqendra perandorake e Dinastisë Tang (613-907).
Ishte qendra kineze për Rrugën e lashtë të Mëndafshit, kur tregtarët kinezë dhe persianë tregtonin mallra dhe hapi Kinën ndaj botës perëndimore.
Xi'an qëndron si një fener për nismën “Një brez, një rrugë”, ndërsa ekspozita e këtij viti u fokusua në temën e forcimit të ndërlidhjes dhe integrimit për përparim të përbashkët, përfitime të përbashkëta dhe rezultate të favorshme.
Përshtatja me ndryshimin e tendencave të biznesit global
Nisma “Një brez, një rrugë” ka përparësi kryesore për shtetet e saj anëtare. Projektet e infrastrukturës shërbejnë për një vlerë pragmatike. Vendet mund të ecin përpara në ndërtimin e infrastrukturës së fortë ose mund të ndjekin më shumë zhvillim në atë që konsiderohet si infrastrukturë e butë. Kjo do të kërkonte më shumë financim për teknologjitë e komunikimit të informacionit (TIK).
Prandaj, Rruga Digjitale e Mëndafshit u lançua në vitin 2015 për të nxitur tregtinë elektronike ndërkufitare, qytetet inteligjente, telemjekësinë dhe financat e internetit, duke përshpejtuar përmirësimet në llogaritjen e të dhënave të mëdha, inteligjencën artificiale dhe informatikën kuantike, siç bëhet e ditur në raportet e mediave.
Firmat kineze të teknologjisë dhe investitorët kanë zgjeruar shtrirjen e tyre globale duke punuar më ngushtë me shtetet anëtare të nismën “Një brez, një rrugë”. Kjo do të shpjegonte pse vendet e Këshillit të Bashkëpunimit të Gjirit (GCC) kanë lidhje thelbësore me Pekinin.
Vendet e Këshillit të Bashkëpunimit të Gjirit, veçanërisht Arabia Saudite, kanë mjaft kapital pasi mbajnë një bollëk rezervash nafte dhe gazi. Megjithatë, ata kërkojnë të diversifikojnë strukturën e tyre ekonomike mes rritjes së popullaritetit për burimet e rinovueshme dhe më shumë vende po largohen nga një mbështetje e tepruar në lëndët djegëse fosile. Riadi beson se investimet më të thella në Rrugën Digjitale të Mëndafshit mund të ndihmojnë vendin të modernizohet për fitime edhe më të mëdha.
Bashkëpunimi global jep shpresë
Në kohët e lashta, Xi'an kishte marrëdhënie të gjalla tregtare me kombet arabe. Qyteti shërbeu si një korridor ku Lindja takohet me Perëndimin. Ekspozita e 6-të Ndërkombëtare e Rrugës së Mëndafshit shërben si një kujtesë e përshtatshme se përse izolimi tregtar mund të jetë i destinuar ër dështim. Kompanitë mund të përfitojnë nga bashkëpunimi, jo nga pengimi me qëllim të keq.
Shumë kohë më parë, qytetërimet kineze dhe ato persiane ishin krejtësisht të ndryshme nga besimet e tyre kulturore, filozofike dhe sociale. Megjithatë, ishin partnerë të mirë tregtarë pasi refuzuan të lejonin që dallimet e tyre t'i pengonin të komunikonin dhe të tregtonin me njëri-tjetrin.
Le të shpresojmë që fuqitë perëndimore të mund të përqafojnë frymën madhështore të Rrugës së lashtë të Mëndafshit në kohët e sotme dhe ta shohin Xi'an-in si një simbol për të kërkuar konsensus për të siguruar më shumë prosperitet për të gjithë.
