Pas pandemisë që shpërtheu në vitin 2020, ngrihet pikëpyetja mbi panoramën që na pret në vitin aktual. Koronavirusi ka gjeneruar ndikime në sjelljen sociale dhe ekonomike. “Crif” dhe “SDA Bocconi” kryen një studim të përbashkët duke vënë në qendër të vëmendjes të dhëna të ndryshme statistikore dhe ekonomike, duke nxjerrë dhe parashikimet për vitin 2021 nga pikëpamja e konsumit, investimeve dhe kursimeve.
Foto nga VCG
Në parashikimin e studimit për tremujorin e parë të vitit 2021, situata shihet e vështirë, duke pasur parasysh kontekstin e pasigurt dhe të ndjeshëm ndaj ndryshimeve, për shkak të shkaqeve negative prej pandemisë dhe vaksinave.
Pas një viti të vështirë 2020 nga pikëpamja ekonomike, për shkak të krizës pandemike të koronavirusit, 2021-shi mund të shënojë një rikuperim të rëndësishëm për tregjet në zhvillim, të gatshëm për të rimarrë humbjet e pësuara në muajt e fundit. Vendet në zhvillim mund të përfitojnë vërtet nga ndihma monetare dhe fiskale e aktivizuar globalisht për të trajtuar Covid-19 dhe të mbështeten në një vit të rimëkëmbjes ekonomike dhe financiare.
Media amerikane “Bloomberg” punoi për hartimin e renditjes bazuar në rezultatet më të mira të pritura të 17 ekonomive botërore që i përkasin kategorisë së tregut në zhvillim, për të cilat u morën në konsideratë 11 tregues të performancës.
Mes tyre, u analizuan jo vetëm elementët objektivë që përcaktojnë trendin e rritjes, por edhe pritjet ndaj vendeve të ndryshme. Një kriter, ky i fundit, i cili garanton disa surpriza për vendosjen përfundimtare.
Kontinenti aziatik do të jetë protagonist i rritjes ekonomike për vitin 2021, me Kinën, Indinë dhe Filipinet që kryesojnë në të gjithë botën për ritmet e pritshme të rritjes.
2020-ta u mbyll si një vit i karakterizuar mbi të gjitha nga epidemia Covid-19, e cila çoi në një emergjencë serioze shëndetësore dhe ekonomike për ekonomitë kryesore perëndimore. Trendi në botën ekonomike dhe financiare të së ardhmes, parashikimet e vitit 2021 për tregjet kryesore dhe letrat me vlerë të referencës janë tashmë të evidentuara. Por, ekspertët kanë bërë parashikimet e tyre në lidhje me skenarët që mund të lindin me vitin e ri.
Foto nga VCG
Viti 2020 do të mbetet gjatë në kujtesë. Me fundin e emergjencës, natyrshëm tundohemi të projektojmë veten drejt së ardhmes, duke u përpjekur të imagjinojmë jetën tonë përtej pandemisë. Si në fillim të çdo viti, ekspertët angazhohen në aktivitetin e rinovimit të vlerësimeve strategjike, për të identifikuar strategjinë që do të drejtojë ndërtimin e portofoleve të investimeve në vitet e ardhshme. Këtë vit angazhimi është i dyfishtë: jo vetëm që duhet të rinovohen vlerësimet afatgjata, por njerëzit janë të orientuar për të kuptuar drejtimin që do të marrë ekonomia globale dhe shoqëria në të ardhmen.
Lajmet kryesore që kanë karakterizuar vitin e kaluar dhe fillimin e këtij aktual përqendrohen në dy tema: ekonomia dhe shëndetësia. Rrallë këto çështje kanë qenë kaq të drejtpërdrejta dhe aq në qendër të vëmendjes jo vetëm të investitorëve, por të publikut të gjerë. Kur thuhet që shpresohet që 2021-shi të jetë një vit më i mirë dhe më pak dramatik, referenca është në këto dy fusha kryesore.
Nga kujdesi shëndetësor te rimëkëmbja ekonomike, e ardhmja e afërt varet nga e njëjta përzierje e faktorëve që ndikuan në vitin 2020, secili me potencialin për të ndikuar jo vetëm në kthimin e investitorëve, por edhe në jetën e miliarda njerëzve dhe miliona bizneseve në të gjithë globin.
Rimëkëmbja ekonomike është një tjetër temë kryesore dhe sipas ekspertëve nuk duket i paarsyeshëm optimizmi për të shpresuar që 2021-shi të jetë një vit më pozitiv ekonomikisht. Vlen të përmendet se, para pandemisë, jo të gjitha ekonomitë po dilnin shumë mirë. Cikli ekonomik po tregonte shenja pjekurie, veçanërisht në vende dhe rajone të caktuara. Në këtë kuptim, suksesi i vaksinave Covid-19 nuk ka gjasa të jetë një plumb argjendi për ekonomitë e trazuara në të gjithë botën.
Foto nga VCG
Ka shqetësime para-ekzistuese në lidhje me fusha të tilla si rritja dhe papunësia, veçanërisht në Evropën Perëndimore, të cilat janë përkeqësuar vetëm nga pandemia globale. Sidoqoftë, tregjet financiare, veçanërisht nga ana e kapitalit neto, janë optimistë, me vlerësime mbi mesataren e tyre afatgjatë dhe një numër treguesish të ndjenjës që sugjerojnë se investitorët janë relativisht pozitivë në lidhje me parashikimin për vitin 2021.
Sigurisht që ka arsye të vlefshme; supozimi se plani i vaksinimit fillon të ketë efekte konkrete të pranverës, ka të ngjarë të shihet një rikthim i rëndësishëm jo vetëm në aktivitetin ekonomik, por edhe në përfitimin e korporatave. E gjithë kjo duhet të shkojë paralelisht me një 2021 pozitiv për investimet.
Irma Paloli
