Organizata për Bashkëpunim Ekonomik dhe Zhvillim (OECD) parashikon që dëmi ekonomik botëror nga pandemia COVID-19 nuk do të jetë aq i madh sa ishte menduar, por rimëkëmbja ekonomike vitin e ardhshëm mendohet të jetë më modeste nga sa pritej.

Sipas OECD-së, ekonomia globale pritet të ketë një rimëkëmbje prej 5 për qind, sipas kësaj organizate, ndonëse paraprakisht kishte parashikuar rritje prej 5.2 për qind.

Në çerekun e dytë të vitit 2020, prodhimi global ka qenë 10 për qind më i ulët sesa në fundin e vitit të kaluar, përpara shpërthimit të pandemisë. OECD-ja e ka cilësuar një rënie të tillë si “shok të pashembullt të kohërave moderne”. Sipas organizatës, e vetmja ekonomi që do të zgjerohet gjatë vitit 2020, me rreth 1.8 për qind, parashikohet të jetë Kina.

OECD-ja paralajmëroi se pandemia COVID-19 do të vazhdojë të ushtrojë një dëm të konsiderueshëm në ekonomi dhe shoqëri, kështu që perspektiva ekonomike mbetet e pasigurt.

"Tani po shohim një rimëkëmbje pas lehtësimit të masave të rrepta të mbylljes dhe rihapjes së bizneseve, por pasiguria mbetet e lartë dhe besimi është ende i brishtë," thuhet në raport.

OECD-ja tha se perspektivat e rritjes varen nga shumë faktorë, përfshirë madhësinë dhe kohëzgjatjen e shpërthimeve të reja COVID-19, shkallën në të cilën mbahen ose përforcohen masat e tanishme të kontrollit, koha derisa të vendoset një trajtim efektiv ose vaksina dhe shkalla në të cilën veprime të rëndësishme të politikës fiskale dhe monetare mbështesin kërkesën.

Mund të shihen ndryshime të konsiderueshme midis ekonomive kryesore, siç janë rishikimet në rritje në Kinë, Shtetet e Bashkuara dhe Evropë, por rezultate më të dobëta se sa pritej në Indi, Meksikë dhe Afrikën e Jugut.

Performancat në tregues të ndryshëm gjithashtu ndryshojnë. Për shembull, rikuperimi i porosive të eksportit global është i dobët, gjë që frenoi ritmin e rimëkëmbjes në vende të tilla si Gjermania, Japonia dhe Koreja e Jugut. Papunësia është rritur në Shtetet e Bashkuara dhe Kanada, ku punonjësit po marrin paga më të ulëta, ndërsa shumë të tjerë kanë humbur vendet e punës.

Kina është i vetmi vend i G20-s në të cilin prodhimi parashikohet të rritet në vitin 2020, mbështetur nga kontrolli i shpejtë i shpërthimit të koronavirusit dhe mbështetja e politikës që nxit punën e shpejtë dhe rifillimin e prodhimit.

Në raport thuhet se rritja ekonomike e Kinës parashikohet të jetë 1.8 për qind, nga një parashikim i qershorit i një tkurrje prej 2.6 për qind, gjithashtu rritja e vetme pozitive midis vendeve dhe rajoneve të analizuara në raport.

Veprimtaria ekonomike e Kinës u rikuperua shpejt në nivelet para-pandemike deri në fund të tremujorit të dytë. Prodhimi industrial i vlerës së shtuar të Kinës u rrit 5.6 për qind me bazë vjetore në gusht, duke shënuar fitimin më të shpejtë në tetë muaj. Eksportet e vendit u rritën 9.5 për qind muajin e kaluar, fitimi më i lartë në 17 muaj.

Mbështetja ndaj politikës monetare dhe fiskale duhet të vijojë

Masat lehtësuese të politikave të marra nga bankat qendrore që nga fillimi i pandemisë kanë mbështetur stabilizimin ekonomik dhe uljen e kostove të shërbimit të borxhit qeveritar, por rikuperimi i vazhdueshëm është i ngadaltë. Prandaj, do të nevojiten masa plotësuese të politikës fiskale dhe strukturore për të ndihmuar në rivendosjen e besimit, kërkesës dhe dinamizmit ekonomik dhe për të trajtuar ndikimin asimetrik të pandemisë midis sektorëve dhe familjeve, shtohet në raport.

Vendet kanë marrë gjithashtu mbështetje të konsiderueshme fiskale që prej shpërthimit të pandemisë me synim parandalimin e një recesioni. Masat fiskale duhet të vijojnë edhe në vitin 2021 pasi tërheqja e hershme e këtyre masave mund të pengojë rritjen, paralajmëroi raporti.

Në të njëjtën kohë, qeveritë duhet të rivlerësojnë bilancin e masave mbështetëse, duke siguruar që ato të jenë të synuara mirë dhe të monitoruara nga afër.

Për më tepër, ndërhyrjet gjithëpërfshirëse të shëndetit publik mbeten të domosdoshme për të kufizuar dhe zbutur shpërthimet e reja dhe për të zvogëluar pasigurinë për konsumatorët dhe bizneset ndërsa paqartësitë mbeten për evolucionin e pandemisë në muajt e ardhshëm, thuhet në raport.

Bashkëpunimi dhe bashkërendimi i zgjeruar global është thelbësor për të zbutur dhe mposhtur virusin, për të shpejtuar shërimin dhe për të mbajtur rrjedhën e tregtisë dhe investimeve.