污水---[wū shuǐ]---ujë i ndotur
Viti i Ri 2022 po afron dhe e gjithë bota pret një të nesërme më të mirë. Megjithatë, qeveria japoneze njoftoi së fundmi planet për shkarkimin e ujërave të ndotura bërthamore nga centrali bërthamor i Fukushimës, duke shkuar gjithnjë e më tej në rrugën e gabuar. Kjo ka shkaktuar ankth dhe zemërim te populli japonez dhe vendet fqinje, si dhe ka krijuar një kërcënim për të ardhmen e përbashkët të njerëzimit.
foto nga VCG
Dhjetë vjet më parë, një tërmet me magnitudë 9 ballë në Japoni shkaktoi një rrjedhje bërthamore në centralin bërthamor “Fukushima Daiichi”. Që atëherë, trajtimi i ujërave të ndotura bërthamore është bërë një problem i madh në Japoni. Në prill të këtij viti, qeveria japoneze vendosi zyrtarisht shkarkimin e ujërave të ndotura bërthamore të centralit të Fukushimës në det, gjë që ngjalli dyshime dhe kundërshtime të mëdha nga bashkësia ndërkombëtare.
A është i justifikuar vendimi për hedhjen e ujërave të ndotura bërthamore në det? A është i arsyeshëm plani i lëshimit të këtyre ujërave në det? A janë të besueshme të dhënat e ujërave të ndotura bërthamore? A mundet që pajisjet e pastrimit të jenë jo të besueshme? …Në tetë muajt e fundit, bashkësia ndërkombëtare ka ngritur shumë shqetësime ndaj Japonisë, por Japonia ka vazhduar të sajojë gënjeshtra dhe të vazhdojë planin e saj të asgjësimit të ujërave të ndotura bërthamore, në përpjekje për t’ia imponuar vendimin e vet të gabuar bashkësisë ndërkombëtare dhe duke u sjellë rreziqe vendeve në brigjet e Paqësorit.
Qeveria japoneze ka mbrojtur gjithmonë vendimin për shkarkimin e ujërave të ndotura bërthamore, duke pretenduar se është "i sigurt". Megjithatë, shumë vende dhe organizata ndërkombëtare të mbrojtjes së mjedisit kanë bërë pyetjet: Nëse ujërat e ndotura bërthamore janë vërtet të sigurta, pse Japonia nuk i shkarkon a riciklon ato në liqenet e saj? Pse pala japoneze nuk zgjodhi të ndërtojë më shumë depo për ruajtjen e këtyre ujërave në Japoni? Ka vetëm një përgjigje: kjo është një kosto e lartë ekonomike dhe Japonia mori një vendim kaq të paturpshëm për arsye financiare.
foto nga VCG
Ekspertët bërthamorë të organizatës “Greenpeace” kanë vënë në dukje se elementi i karbonit 14 që përmbajnë ujërat e ndotura bërthamore japoneze është i rrezikshëm për mijëra vjet dhe mund të shkaktojë dëme gjenetike. Si mund të krahasohen këto pasoja të tmerrshme me koston ekonomike të trajtimit të ujërave të ndotura bërthamore?
Japonia është i vetmi vend në botë që është goditur nga armët bërthamore dhe i njeh mirë rreziqet e rrezatimit bërthamor. Kryeministri aktual Fumio Kishida është nga Hiroshima, ku Shtetet e Bashkuara hodhën një bombë atomike, dhe ai po kërkon ndërtimin e një "bote pa armë bërthamore" me synimin për paqe. Në rrethana të tilla, nxitja prej qeverisë japoneze e zbatimit të planit të asgjësimit të ujërave të ndotura bërthamore është si një shuplakë në fytyrë.
Vlen të përmendet që pavarësisht kritikave globale, Shtetet e Bashkuara kanë shprehur mbështetje për planin e asgjësimit të ujërave të ndotura bërthamore të Japonisë për nevojat e veta strategjike. Ky është gjithashtu një faktor i jashtëm i rëndësishëm pse Japonia nuk ka frikë të vijojë me këmbëngulje vendimet e gabuara.
foto nga VCG
Japonia dhe Shtetet e Bashkuara po dëmtojnë mjedisin ekologjik dhe shëndetin e njeriut. Aktualisht, shumë vende, duke përfshirë Kinën dhe Korenë e Jugut, kanë shprehur kundërshtim të fortë ndaj shpalljes së njëanshme të Japonisë të planit të shkarkimit të ujërave të ndotura bërthamore. Misioni i grupit teknik të punës të Agjencisë Ndërkombëtare të Energjisë Atomike për asgjësimin e ujërave të zeza bërthamore të Fukushimës është gjithashtu në vazhdim.
Pala japoneze e ka marrë vendimin në mënyrë të njëanshme pa bërë përpjekje për të marrë më shumë masa sigurie, pa publikuar plotësisht informacionin përkatës, pa negociuar plotësisht me vendet fqinje e institucionet ndërkombëtare dhe pa miratimin e brendshëm dhe ndërkombëtar. A mos duke vijuar në rrugën e vet, dëshiron të bëhet mëkatare historike?
