Ditën e parë të Vitit të Ri është zakon që çiftet e martuara t'u japin fëmijëve ose të rriturve të pamartuar zarfa të kuq me një sasi të vogël parash brenda. Pastaj pjesëtarët e familjes nisin urimet derë më derë, duke filluar nga të afërmit e tyre, e pastaj te fqinjët.

Dita e tretë është "Kai Nien" ose "Dita e zënkës". Ajo quhet kështu, sepse besohet se nëse grindesh këtë ditë, do të kesh shumë mosmarrëveshje gjatë gjithë vitit. Ashtu si në shprehjen "Të shkuara, të harruara", mëritë lihen pas, në vitin e vjetër.

Ndërsa dita e shtatë e Vitit të Ri quhet "Dita e të gjithëve", sepse është një ditë që i kushtohet festimit të lindjes së secilit pjesëtar të familjes.

Dita e 15-të dhe e fundit quhet Festa e Fenerëve, që simbolizojnë fatin e mirë, lumturinë e shëndetin. Kjo festë kremtohet me këngë, valle e shfaqje me fenerë.

Megjithëse disa nga zakonet e ritet e festimit të Vitit të Ri kinez kanë ndryshuar me kalimin e kohës, përsëri mesazhi që qëndron në bazë të tyre mbetet i njëjtë, ai i paqes e i lumturisë për pjesëtarët e familjes, miqtë e të afërmit.