Foto nga CFP

Shkencëtarët kinezë kanë zbuluar rishtazi 46 liqene nënakullnajorë  në Antarktidën Lindore, duke përdorur një metodë inovative analize, njofton Xinhua. Antarktida është e mbuluar nga një shtresë e madhe akulli me një trashësi mesatare prej mbi 2400 metra. Nën këtë shtresë akulli, ekzistojnë shumë liqene të larmishëm nënakullnajorë . Ato formohen kur rrjedhat e shkrirjes së akullit rrjedhin mbi depresionet në shtratin nën shtresën e akullit, tha Tang Xueyuan, një drejtues i grupit kërkimor nga Instituti i Kërkimeve Polare të Kinës (PRIC).

"Studimi i liqeneve nënakullnajorë  në Antarktidë është i një rëndësie të madhe për të kuptuar dinamikën e fletës së akullit, proceset sedimentare, ciklet gjeokimike nën akullnajat, si dhe evolucionin e jetës," tha Tang.

Shkencëtarët kanë prezantuar një metodë të re duke përdorur koduesin automatik variacional (VAE) për të analizuar tiparet e formës valore të reflektimit të fundit të akullit të treguara në të dhënat e radarit të akullit. Duke përdorur këtë qasje, ekipi hulumtues kreu një skanim gjithëpërfshirës të imazheve të radarit të akullit në rajonin AGAP-S të maleve nënakullnajorë  Gamburtsev në Antarktidën Lindore. Rezultatet zbuluan ekzistencën e 46 liqeneve nënakullnajorë  të karakterizuara nga konturet gjeometrike dukshëm më të vogla se ato të identifikuara nga metodat konvencionale.

Shkencëtarët besojnë se kjo metodë e re përmirëson ndjeshëm efikasitetin dhe saktësinë e zbulimit të liqeneve nënakullnajorë  dhe gjithashtu premton shtrirjen në zbulimin dhe etiketimin e më shumë llojeve të mjediseve nënakullnajorë  në Antarktidë.

Ky hulumtim u krye së bashku nga ekipe nga PRIC, Universiteti i Gjeoshkencave të Kinës dhe Universiteti Jugor i Shkencës dhe Teknologjisë.

Sipas statistikave aktuale, shkencëtarët në mbarë botën kanë zbuluar gjithsej 675 liqene nënakullnajorë  nën shtresën e akullit të Antarktidës, me tre prej tyre të shpuara dhe kampionuar me sukses. (Fatosi)