Foto nga ministria e Jashtme e Kinës

Ambasada e Kinës në Zambia dhuroi rreth 500.000 dollarë për qeverinë e Zambias për të ndihmuar vendin në luftën kundër kolerës. Kontributi është pjesë e masave të ndihmës ndaj kolerës të shpallura nga ambasada në kulmin e shpërthimit të kolerës në janar të këtij viti, shkruan “CGTN”.

I ngarkuari me punë në Ambasadën e Kinës, Wang Sheng, tha se ambasada ka punuar me autoritetet e Zambias për të zbatuar masat e ndihmës muajin e kaluar.

“Ne jemi të kënaqur të shohim se shpërthimi i kolerës në Zambia është zbutur, por çrrënjosja e saj mbetet një detyrë afatgjatë”,- tha ai gjatë një ceremonie dorëzimi ku mori pjesë dhe ministri i Financave dhe Planifikimit Kombëtar të Zambias, Situmbeko Musokotwane.

Zambia ka luftuar një shpërthim kolere që nga tetori i vitit të kaluar, me mbi 20.000 raste të prekurish dhe mbi 700 vdekje.

Wang tha se fondet do të ndihmojnë qeverinë dhe njerëzit e Zambias të përmirësojnë kanalizimet dhe furnizimin me ujë për të shmangur një shpërthim tjetër.

Ai tha se një prodhues kinez i vaksinave ka eksploruar mundësinë e prodhimit të vaksinës në Zambia pas një kërkese nga qeveria e Zambias, si një masë afatgjatë për të parandaluar përsëritjen e një shpërthimi të kolerës në shkallë të gjerë.

Musokotwane falënderoi Kinën për donacionin, duke thënë se suksesi i qeverisë së Zambias në kontrollin e shpërthimit të kolerës i atribuohet jo vetëm vendosmërisë dhe angazhimit të saj, por edhe mbështetjes nga partnerë të tillë si Kina.

Ai lavdëroi gjithashtu mbështetjen e Kinës për Zambian gjatë viteve, duke përfshirë procesin e ristrukturimit të borxhit të vendit.

Wang tha se qeveria dhe populli kinez do të vazhdojnë të ofrojnë ndihmë në luftën e Zambias kundër thatësirës.

Në fund të shkurtit, qeveria e Zambias shpalli një gjendje kombëtare të fatkeqësisë dhe emergjencës për shkak të thatësirës së zgjatur që kërcënoi sigurinë kombëtare të ushqimit dhe mungesat e energjisë elektrike. (Irma)