Foto nga VCG
Kina ka arritur mbrojtje të institucionalizuar dhe shërbime sistematike për personat me aftësi të kufizuara, deklaroi Zhou Lulu, eksperte nga Universiteti Guangzhou, citon “Xinhua”.
Në debatin vjetor mbi të drejtat e personave me aftësi të kufizuara gjatë sesionit të 55-të të Këshillit të të Drejtave të Njeriut, Zhou shpjegoi veprimet proaktive të Kinës në mbrojtjen e të drejtave të personave me aftësi të kufizuara.
Zhou theksoi se personat me aftësi të kufizuara duhet të gëzojnë të drejta në të gjitha aspektet e jetës shoqërore, pa u kufizuar, në arsim, punësim, jetën kulturore dhe mirëqenien sociale.
Qëllimi është të sigurohet që individët me aftësi të kufizuara të mund të marrin pjesë aktive në jetën shoqërore, të kuptojnë vetëvlerësimin e tyre dhe të gëzojnë të njëjtin dinjitet dhe të drejta si qytetarët e tjerë, tha ajo.
Kina ka miratuar një sërë ligjesh, rregulloresh dhe politikash duke bërë përpjekje në promovimin e arsimit gjithëpërfshirës, punësimin gjithëpërfshirës dhe ndërtimin e mjediseve pa pengesa, tha Zhou.
Gjatë dekadës së fundit, sektori i aftësisë së kufizuar të Kinës ka dëshmuar arritje të jashtëzakonshme, tha ajo, duke shtuar se mbi 7.1 milionë njerëz me aftësi të kufizuara në zonat rurale janë nxjerrë nga varfëria absolute dhe një sistem i veçantë i mirëqenies është krijuar në mbarë vendin, duke përfshirë dy subvencione për personat me aftësi të kufizuara dhe ndihmë rehabilituese për fëmijët me aftësi të kufizuara.
Sipas Zhou, shërbimet e ofruara për personat me aftësi të kufizuara janë transformuar nga mbulimi i pjesshëm në përfshirjen e të gjithë popullatës me aftësi të kufizuara, nga ndihma e përkohshme në mbrojtjen e institucionalizuar dhe nga mbështetja e individualizuar në shërbime të rregullta. (Irma)
