Gaza (Foto Panorama)

Raundi i fundit i bisedimeve për armëpushim në Rripin e Gazës ka përfunduar pa ndonjë përparim.

Hamasi u takua me ndërmjetës në Egjipt, ndërsa Izraeli nuk dërgoi përfaqësues, pasi kërkonte të shihte paraprakisht një listë të të gjithë pengjeve ende gjallë, shkruan “Panorama”.

Zyrtari i lartë i Hamasit, Bassem Naim, tha se kjo nuk do të ishte e mundur pa një armëpushim, sepse pengjet ishin shpërndarë në të gjithë zonën e luftës.

“Netanyahu nuk dëshiron të arrijë një marrëveshje dhe topi tani është në fushën e amerikanëve”, tha ai.

SHBA-ja bëri të ditur se një marrëveshje e miratuar nga Izraeli ishte tashmë në tryezë dhe se i takonte Hamasit ta pranonte atë, por Hamasi e ka kundërshtuar këtë.

Bisedimet në Egjipt cilësoheshin si ndër pengesat e fundit për të arritur një armëpushim 40-ditor, me dhjetëra pengje të liruar dhe ndihmën e pranuar. (Elona)