Foto nga VCG
Sa kohë i duhet një lexuesi për të marrë një libër pasi ka bërë një porosi në një bibliotekë me mbi 8 milionë? Përgjigjja nga një bibliotekë e re në periferi të Pekinit është në më pak se 15 minuta. E ndodhur në rrethin lindor të Tongzhou, Biblioteka e Pekinit është bërë një destinacion popullor qëkur u hap në fund të dhjetorit. Sipas të dhënave zyrtare, ajo pati mbi 80.000 vizita nga lexues të interesuar gjatë festës treditore të Vitit të Ri. Dashamirët e librit tërhiqen jo vetëm nga dizajni arkitektonik i bibliotekës, i cili i ngjan një hapësire leximi nën një pemë gjigante ginkgo-je, por edhe nga koleksioni i bollshëm i librave dhe shërbimeve inteligjente.
E shtrirë në rreth 75.000 metra katrorë, Biblioteka e Pekinit ka mbi 8 milionë libra. Raftet e larta në katin e bodrumit të bibliotekës kontribuojnë në kapacitetin e saj masiv. Ato janë pjesë e sistemit më të madh të vetëm të automatizuar të ruajtjes dhe rikthimit, i njohur dhe si AS/RS, sistemi i automatizuar i ruajtjes dhe rikthimit, për librat në Kinë.
Raftet kanë një sipërfaqe totale magazinimi prej më pak se 3000 metra katrorë, megjithatë ato mund të ruajnë deri në 7.1 milionë libra kryesisht për shkak të dizajnit të tyre të veçantë. Një depo kaq e madhe do të kërkonte një hapësirë ruajtjeje prej të paktën 10.000 metrash katrorë në një bibliotekë tradicionale. Sistemi inteligjent përfshin lloje të ndryshme të pajisjeve inteligjente, si robotët, të cilët mundësojnë shpërndarjen inteligjente të librave dhe ndihmojnë në renditje.
“Sistemi i automatizuar i ruajtjes dhe marrjes së librave funksionon si truri i zgjuar i bibliotekës, duke mundësuar një sërë shërbimesh shumë efikase që reduktojnë punën manuale”,- deklaroi Shi Qi, menaxher i përgjithshëm i njësisë së biznesit AS/RS të “Jiatu Technology”, ofruesi i shërbimit të leximit inteligjent përgjegjës për hartimin e sistemit të automatizuar të ruajtjes dhe rikthimit të librave të Bibliotekës së Pekinit.
Biblioteka e Pekinit nuk është e vetmja në adoptimin e metodave novatore të ruajtjes së librave. Biblioteka Suzhou Nr.2, e cila u hap në fund të vitit 2019, ishte biblioteka e parë kineze që përqafoi sistemin inteligjent të ruajtjes dhe marrjes së librave.
Foto nga VCG
“Ndërsa më shumë qeveri vendore vendosin në axhendën e tyre pasurimin e jetës kulturore, ne po shohim një interes në rritje nga bibliotekat publike për të futur sistemin inteligjent të ruajtjes dhe rikthimit të librave”,- tha Shi.
Për ta bërë më të lehtë huazimin e librave, lexuesit në Bibliotekën e Pekinit mund të regjistrohen për një shërbim huazimi të fuqizuar nga njohja e fytyrës dhe teknologji të tjera. Një udhëzues digjital në hyrje të bibliotekës ofron gjithashtu ndërveprime sipas kërkesës me vizitorët. Lexuesit që duan të shmangin vajtjen në bibliotekë, mund të përdorin shërbimin e huazimit online, i cili do t'ua dorëzojë librin në shtëpi.
Shërbimi i huazimit në internet i bibliotekës është i hapur për lexuesit jo vetëm në Pekin, por edhe në provincën fqinje Tianjin dhe Hebei.
“Kjo është një përvojë mjaft novatore për të vizituar bibliotekën. Librat pasurojnë mendjen, ndërsa disa nga shërbimet inteligjente këtu janë të papara”,- deklaroi Meng Fan, një nxënëse vendase e klasës së gjashtë.
