Protesta ne Austri (Foto Rtsh)
Mijëra qytetarë austriakë protestuan në sheshin para Parlamentit në Vjenë, për të marrë pjesë në aktivitetin “Deti me drita”, kundër ekstremizmit të djathtë, i cili shihet si kërcënim ndaj demokracisë, njofton “RTSH”.
Në më shumë se 30 lokacione, protestuesit mbajtën blicët e celularëve ndezur, ose një qiri në dorë.
Nisma “Të mbrojmë demokracinë” u nxit nga zbulimi i faktit se në muajin nëntor ekstremistët në Gjermani, të përfaqësuar nga partia AfD, morën pjesë në një takim së bashku me ish-kreun e Lëvizjes Identitare të Austrisë, Martin Sellner, për të diskutuar planet rreth dëbimit të masë të miliona njerëzve të ardhur si emigrantë në këto dy vende.
Përveç organizimeve në komunitetet e vogla, tubimet u mbajtën edhe në kryeqendrat e provincave të Lincit, Salcburgut dhe Insbrukut, ndërsa të premten mbrëma u protestua edhe në Klagenfurt.
Një demonstratë më e madhe është planifikuar në mesin e muajit mars në Vjenë. (Fatosi)