Foto nga Ministria e Punëve e Jashtme e Kinës
Ministri i Jashtëm kinez Wang Yi tha të enjten se të gjithë anëtarët e Organizatës së Bashkëpunimit të Shangait (OBSh) duhet të synojnë së bashku zhvillimin e shëndetshëm të organizatës dhe ta bëjnë atë një stabilizuese në sfondin e ndryshimeve të botës.
Wang, gjithashtu anëtar i Byrosë Politike të Komitetit Qendror të Partisë Komuniste të Kinës, i tha këto në një pritje në Pekin për 20-vjetorin e Sekretariatit të OBSh-së.
Duke vënë në dukje që ndryshimet e papara në një shekull po zhvillohen me një ritëm më të shpejtë dhe se bota ka hyrë në një periudhë të re turbullirash dhe transformimi, Wang u shpreh që ka një nevojë më të madhe për të vazhduar Shpirtin e Shangait dhe për një platformë të tillë bashkëpunimi si OBSh-ja.
Foto nga Ministria e Punëve e Jashtme e Kinës
Ai tha se të gjitha vendet anëtare duhet të punojnë së bashku për ta bërë OBSh-në më të madhe dhe më të fortë. Kina do të vazhdojë ta ketë OBSh-në një përparësi diplomatike, do të ofrojë si gjithmonë kushte të përshtatshme dhe mbështetje për punën e Sekretariatit dhe do të mbështesë punën e Kazakistanit në kryesimin e radhës të OBSh-së.
Kina është e gatshme të punojë me të gjitha palët për të siguruar që Samiti i Astanasë këtë vit të sjellë rezultate të frytshme, do të hapë perspektiva të reja për zhvillimin e OBSh-së dhe do të kontribuojë më shumë në paqen e përhershme dhe begatinë e përbashkët të botës, theksoi Wang.
Gjatë 20 viteve të fundit, OBSh-ja është rritur nga gjashtë vende anëtare në një familje të madhe me 26 vende anëtare, vëzhguese dhe partnere dialogu, duke krijuar një model të ri bashkëpunimi me solidaritet dhe koordinim, hapje, përfitime të përbashkëta, përfshirje dhe mësim të ndërsjellë midis vendeve me sisteme shoqërore dhe rrugë zhvillimi të ndryshme, tha Zhang Ming, sekretari i përgjithshëm i OBSh-së.
Foto nga Ministria e Punëve e Jashtme e Kinës
Ai shtoi se Sekretariati do të vazhdojë të japë mbështetje të fortë për zhvillimin e OBSh-së.
Më tepër se 200 veta, duke përfshirë të dërguarit diplomatikë të vendeve të OBSh-së dhe përfaqësues të organizatave ndërkombëtare në Kinë, morën pjesë në këtë pritje.
