Protestues ne Tel Aviv (Foto Oranews)

Mijëra demonstrues në Izrael dolën në rrugë në fundjavë për të kërkuar që qeveria të bëjë më shumë për të siguruar lirimin e pengjeve të rrëmbyer nga organizata militante palestineze Hamas, shkruan “ATSH”.

Tubimi i familjeve të pengjeve në metropolin bregdetar të Tel Avivit u mbajt nën sloganin “120 ditë nën tokë” në lidhje me numrin e ditëve që janë mbajtur më shumë se 130 pengje.

Në një tjetër demonstratë në Tel Aviv, pjesëmarrësit kërkuan dorëheqjen e kryeministrit izraelit Benjamin Netanyahu dhe zgjedhje të parakohshme.

Ata akuzuan kryeministrin Netanyahu për nënshtrimin e përpjekjeve për të siguruar lirimin e pengjeve ndaj kërkesave të mbijetesës së tij politike.

Netanyahu qeveris së bashku me partitë fetare ultra të djathtë. Udhëheqësit e tyre po kërcënojnë se do të thyejnë koalicionin qeverisës nëse Netanyahu bën lëshime ndaj Hamasit.

Rreth 1000 persona demonstruan gjithashtu në Jeruzalem në favor të lirimit të pengjeve.

Protesta dhe demonstrata të ngjashme u zhvilluan edhe në Haifa, Beersheba dhe para banesës së kryeministrit Netanyahu në Cezare.

Në sfondin e luftës së Gazës, aktualisht po bëhen përpjekje nga SHBA-ja, Egjipti dhe Katari për të ndërmjetësuar një marrëveshje të re pengjesh midis Izraelit dhe Hamasit. Një propozim që parashikon lirimin gradual të pengjeve në këmbim të një armëpushimi më të gjatë dhe lirimin e të burgosurve palestinezë thuhet se është pranuar nga negociatorët izraelitë dhe tani është përpara Hamasit për miratim. (Fatosi)