Foto nga VCG
Ministri i Jashtëm kinez Wang Yi dhe homologia e tij franceze Catherine Colonna biseduan të premten në telefon për thellimin e bashkëpunimit dypalësh dhe promovimin e marrëdhënieve dypalëshe në një nivel të ri.
Që nga fillimi i këtij viti, marrëdhëniet Kinë-Francë kanë ruajtur një vrull të shëndoshë zhvillimi, tha Wang, gjithashtu një anëtar i Byrosë Politike të Komitetit Qendror të Partisë Komuniste të Kinës.
Vizita e presidentit francez Emmanuel Macron në Kinë në prill ishte një sukses i plotë, tha ai, duke shtuar se dy krerët e shteteve u angazhuan në një komunikim të thellë strategjik dhe hartuan një plan për zhvillimin e marrëdhënieve dypalëshe.
Duke vënë në dukje se viti i ardhshëm shënon 60-vjetorin e vendosjes së marrëdhënieve diplomatike midis dy vendeve, ai tha se Kina është e gatshme të punojë me Francën që ta shfrytëzojnë këtë mundësi për zbatimin e konsensusit të arritur nga të dy liderët, të rifillojnë në mënyrë gjithëpërfshirëse shkëmbimet në të gjitha fushat dhe në të gjitha nivelet, të kompensojnë humbjet e shkaktuara nga pandemia dhe të shtyjnë marrëdhëniet e partneritetit gjithëpërfshirës strategjik Kinë-Francë në një nivel të ri.
Kina ruan stabilitetin dhe vazhdimësinë në politikat e saj ndaj Evropës, tha Wang, duke shtuar se Kina e konsideron gjithmonë Evropën si një pol të rëndësishëm në një botë shumëpolare dhe mbështet Francën në vazhdimin e promovimit të aderimit të BE-së ndaj autonomisë strategjike dhe të luajë rolin kryesor në marrëdhëniet Kinë-Evropë.
Nga ana e saj, Colonna shprehu ngushëllimet e sinqerta për përmbytjet e fundit në Kinë. Ajo tha se Franca dhe Evropa do t'i përmbahen autonomisë strategjike, do të kundërshtojnë fragmentimin global, nuk do të pranojnë shkëputjen dhe ndërprerjen e zinxhirëve industrialë dhe të furnizimit dhe shpresojnë të ndërtojnë një botë multipolare, të ekuilibruar dhe paqësore.
Colonna tha se Franca e vlerëson miqësinë e saj me Kinën dhe i kushton rëndësi të madhe konsensusit të arritur nga dy krerët e shteteve.
Franca është e gatshme të shfrytëzojë rastin e 60-vjetorit të vendosjes së marrëdhënieve diplomatike midis dy vendeve që të thellojnë bashkëpunimin praktik në fusha të ndryshme, të ndërtojnë marrëdhënie dypalëshe me leverdi reciproke, të nxitin zhvillim më të madh të marrëdhënieve Evropë-Kinë dhe të kontribuojnë për paqen dhe stabilitetin ndërkombëtar, tha ajo.
Të dy palët shkëmbyen gjithashtu pikëpamje mbi Ukrainën, Nigerinë dhe çështje të tjera ndërkombëtare dhe rajonale me interes të përbashkët. (Çang Çuo)
