Foto nga instagrami
Instrumentisti shqiptar Vlorent Xhafaj së bashku me dy artistë të huaj solli në qytetin bregdetar në Vlorës një koncert klasik për artdashësit vlonjatë, por edhe turistët e huaj. Violonçelisti Vlorent Xhafaj dhe dy instrumentistët e huaj performuan pjesë të kompozitorëve francezë në teatrin “Petro Marko”. Koncerti i muzikës klasike u ndoq me mjaft interes dhe u duartokit nga publiku. Virtuozi i violonçelit, Vlorent Xhafaj interpretoi me Anna Göckel në violinë dhe Pierre-Yves Hodique në piano. Publiku artdashës shijoi muzikën e bukur klasike franceze, ndërsa trio-ja priti duartrokitjet e ngrohta të publikut shqiptar. Në Teatrin "Petro Marko" përveç publikut shqiptar pati shumë interes edhe nga turistët e huaj italianë, francezë e spanjollë, të cilët janë adhurues të muzikës klasike dhe muzikës së dhomës.
Trio klasike (Foto Shqiptarja.com)
Pas koncertit violonçelisti Vlorent Xhafaj u shpreh mjaft i emocionuar
"Si përherë është shumë emocion në qytetin e lindjes, në Vlorë. Kisha 4 vjet që nuk kam luajtur këtu, që përpara pandemisë. Është përveçse kënaqësi edhe detyrim të vij herë pas here në qytetin e Vlorës për të luajtur vetë, por edhe për të sjellë kolegë të huaj me vlera që luaj me ta në skenat europiane. Publiku është shumë i ngrohtë si përherë", u shpreh Vlorent Xhafaj.
Tre instrumentistët virtuozë luajtën pjesë të kompozitorëve të njohur francezë Ravel, Faure dhe Lekeu. Ky koncert u mbajt nën kujdesin e ambasadës franceze me rastin e Javës Kulturore Franceze në Shqipëri. Ndjehet se publikut shqiptar, kryesisht nëpër qytetet e vendit, i kanë munguar koncertet e muzikës së dhomës, e vitet e fundit këto aktivitete kanë një shtrirje edhe më të gjerë nëpër Shqipëri, sidomos me rastin e aktiviteteve të realizuara në kuadër të Javës së Kulturës Ndërkombëtare.
Violinçelisti shqiptar V. Xhafaj
Portret i instrumentistit Vlorent Xhafaj
Artisti shqiptar Vlorent Xhafaj e ka nisur muzikën dhe instrumentin e violinçelit që në klasën e parë. Ai ka lindur në qytetin e Vlorës por është larguar nga Shqipëria në moshën 16 vjeçare. Një pasion i madh për muzikën dhe një punë intensive me orë të zgjatura duke studiuar, e bëri atë të korrë sukses në skenat botërore. Violinçelisti shqiptar prej vitesh jeton në Francë, por me koncertet e tij është i kudo ndodhur në skena të ndryshme botërore. Prej vitesh Xhafaj është dhe drejtor artistik i festivalit të muzikës së dhomës, “Different Trains Festival”.
Sava Lena
Vlorent Xhafaj (Foto nga instagrami)
V. Xhafaj (Foto personale)