Foto nga VCG
E gjitha bota i ka kthyer sytë nga Pekini, për të parë hartën e re të reformave të përpiluar nga Kina, ndërsa nga 15 deri më 18 korrik u zhvillua në Pekin plenumi i 3-të i Komitetit të 20-të Qendror të Partisë Komuniste të Kinës.
Arritja më e rëndësishme e këtij plenumi është miratimi i Rezolutës së Komitetit Qendror të PKK-së për Thellimin e Mëtejshëm të Reformës në Mënyrë të Gjithanshme për të Çuar Përpara Modernizimin Kinez, ku janë përcaktuar qartë objektivat kryesore, afatet dhe planet për thellimin e mëtejshëm dhe të gjithanshëm të reformave.
Rezoluta ka caktuar drejtimin e nxitjes së modernizimit kinez dhe i ka treguar botës vendosmërinë e Kinës për zbatimin e reformave deri në fund, si edhe mundësitë e përfitimeve të përbashkëta gjatë këtij procesi, theksohet në një koment të CMG-së.
Foto nga VCG
Analistët mendojnë që kjo mbledhje është një gur i ri kilometrik për thellimin e reformave në Kinë. Revista europiane “Modern Diplomacy” vuri në dukje që “rëndësia e plenumit i ka kaluar kufijtë kombëtarë”.
Pse duhet të thellohen më tej reformat në mënyrë të gjithanshme? Nëse shohim gjendjen e jashtme, tani evolucioni i ndryshimeve të shekullit po përshpejtohet, situata gjeopolitike është serioze dhe rimëkëmbja ekonomike botërore është e dobët. Prandaj reforma është një masë e nevojshme për të përballuar rreziqet dhe sfidat e jashtme. Po të shohim gjendjen e brendshme, nxitja e modernizimit kinez përballet me shumë kontradikta e probleme të ndërlikuara dhe është e nevojshme të jepet një shtysë e fortë dhe garanci institucionale për modernizimin kinez, duke thelluar më tej reformat në një mënyrë të gjithanshme. Krahas kësaj, edhe teknologjia po sjell ndryshime të mëdha dhe palët e ndryshme gjenden përballë mundësive të reja, prandaj duhet të thellohen pandërprerë reformat për të kapur këto mundësi.
Mund të shohim që në këtë dokument është qartësuar objektivi kryesor i thellimit të mëtejshëm e të gjithanshëm të reformave, që të vazhdojë të përmirësohet e zhvillohet sistemi i socializimit me karakteristika kineze dhe të nxitet modernizimi i sistemit të administrimit shtetëror dhe forcimi i aftësisë së qeverisjes, vijon komenti i CMG-së. Në këtë dokument janë përcaktuar dy pika kohore: realizimi i modernizimit socialist deri në vitin 2035 dhe realizimi i detyrave të reformave të paraqitura në këtë dokument deri në vitin 2029, kur është 80-vjetori i krijimit të Republikës Popullore të Kinës.
Foto nga VCG
Krahas këtyre, janë paraqitur edhe mbi 300 masa të rëndësishme reformuese, me synim që të eliminohen defektet në konceptet e mendimet dhe në sistemet e mekanizmat për nxitjen e modernizimit të stilit kinez. Disa analistë kanë vënë në dukje që Kina është fokusuar te modernizimi kinez dhe thellimi i mëtejshëm e i gjithanshëm i reformave. Kjo përshtatet jo vetëm me kërkesat e popullit kinez për zhvillim, por edhe me kërkesat e popujve të botës për paqe dhe zhvillim. Është bërë më e qartë që Kina do të ofrojë mundësi të reja për botën me zhvillimin e vet të ri.
Reforma dhe hapja nuk do të ndalen. Gjatë rrugës së zhvillimit, bota e jashtme ka parë guximin dhe vendosmërinë e Kinës për të nxitur fuqimisht reformën dhe hapjen, si dhe përpjekjet e saj për të ofruar vazhdimisht mundësi për zhvillimin të botës. Modernizimi kinez po nxitet vazhdimisht në procesin e reformës e hapjes dhe gjithashtu do të hapë perspektiva të gjera për reformën dhe hapjen, në mënyrë që bota të ketë më shumë përfitime nga "mundësitë e Kinës", e mbyll komentin CMG-ja. (Jiang Lei)