Gaza (Foto RTSH)
Organizata për të drejtat e njeriut “Amnesty International” ka akuzuar Izraelin për keqtrajtim dhe torturim të të burgosurve palestinezë, shkruan “ATSH”.
“Sipas Ligjit për Luftëtarët e Paligjshëm, Izraeli i ndalon në mënyrë sistematike palestinezët. Të burgosurve u mohohet qasja në avokatë ose kontakte me familjet e tyre”,- bëri të ditur “Amnesty International”.
Raporti, i bazuar në intervistat me 27 palestinezë, duke përfshirë pesë gra dhe një djalë 14-vjeçar, përfshin pretendime për torturë, zhdukje me forcë dhe trajtim mizor, çnjerëzor ose poshtërues nga forcat izraelite.
Foto nga VCG
Një burrë 57-vjeçar, i arrestuar gjatë një bastisjeje në një spital në qytetin e Gazës në dhjetor 2023, tha se u mbajt me pranga dhe sy të lidhur për 45 ditë në një kamp ushtarak, ndërsa vuante nga uria dhe rrahjet.
Izraeli nuk ka komentuar mbi pretendimet në raport. Vendi i ka mohuar më parë akuzat për torturë dhe keqtrajtim të të burgosurve palestinezë.
Raporti i “AI”-së kritikoi Ligjin për Luftëtarët e Paligjshëm, i cili është zgjatur disa herë qëkur sulmet e 7 tetorit nga Hamasi ndezën konfliktin aktual në Gaza.
Foto nga VCG
“Amnesty International” bëri të ditur se Izraeli po anashkalon konventat ndërkombëtare të të drejtave të njeriut duke i etiketuar të arrestuarit luftëtarë të paligjshëm.
“AI” bën thirrje që të gjithë të burgosurit që mbahen sipas Ligjit për Luftëtarët e Paligjshëm, duke përfshirë anëtarët e dyshuar të grupeve të armatosura, të trajtohen në mënyrë njerëzore dhe t’u jepet akses tek avokatët. (Elona)
