Ndihma per zjarret (Foto Rtsh)
Katër avionë të dërguar nga Greqia iu bashkuan operacionit për shuarjen e zjarrit në Dropull, duke shmangur rrezikun për banorët.
Ndihma erdhi si mbështetje për Shqipërinë përmes Mekanizmit Europian të Mbrojtjes Civile. Komisioni Europian e cilësoi këtë ndihmë tregues të solidaritetit të BE-së, shkruan “RTSH”.
Në një postim në “X”, Komisioni Europian thekson gatishmërinë për ta mbështetur edhe më tej Shqipërinë për shuarjen e zjarrjeve, në rast se do të jetë e nevojshme.
“Shqipëria ka aktivizuar Mekanizmin Evropian të Mbrojtjes Civile për të trajtuar zjarret në bashkinë Dropull. Greqia ka dërguar katër avionë zjarrfikës. Ky është solidariteti i BE në veprim. Ne jemi të gatshëm për mbështetje të mëtejshme për Shqipërinë nëse është e nevojshme”, shkruhet në reagim.
Zjarri në Dropull vijon prej dy ditësh, ndërsa flakët ndihmohen edhe nga era e fortë në zonë që riaktivizon vatrat. (Irma)