Biden dhe Trump (Foto RTSH)
Presidenti amerikan, Joe Biden, ka deklaruar se fluturimet me avion disa herë rreth botës para debatit presidencial me Donald Trump ishin shkak për performancën e tij të dobët të 27 qershorit.
“Unë nuk e dëgjova stafin tim dhe më pas gati më zuri gjumi në skenë”,- tha ai para gazetarëve.
Vërejtjet e Biden vijnë mes panikut brenda partisë përpara zgjedhjeve të nëntorit për gjendjen e tij mendore dhe pasi një kongresmen nga Teksasi u bë ligjvënësi i parë demokrat në detyrë që i bëri thirrje atij të tërhiqej.
“Ky nuk është një justifikim, por një shpjegim”,- tha Biden. Ai kërkoi falje për performancën e tij dhe tha se ishte kritike që ai të fitonte rizgjedhjen, citon “RTSH”.
Biden u kthye për herë të fundit nga udhëtimi më 15 qershor, gati dy javë përpara debatit presidencial.
Biden bëri dy udhëtime të veçanta në Europë në harkun kohor prej dy javësh muajin e kaluar.
Më 15 qershor, ai u shfaq në një mbledhje fondesh përkrah ish-presidentit Barack Obama pas një udhëtimi gjatë natës nga Italia. Ai u kthye në Uashington DC të nesërmen. (Elona)