Foto nga VCG
John Lee, shefi ekzekutiv i Rajonit të Posaçëm Administrativ të Hong Kongut (HKSAR) të Kinës përshëndeti përfundimin thelbësor të konsultimeve midis Ministrisë së Tregtisë së Kinës dhe qeverisë HKSAR, për liberalizimin e mëtejshëm të tregtisë në shërbime në kuadrin e Marrëveshjes së Partneritetit (CEPA), shkruan “Xinhua”.
Ministria e Tregtisë njoftoi të hënën se u arrit një marrëveshje pas konsultimeve midis ministrisë, departamenteve përkatëse dhe qeverisë së HKSAR nën CEPA-n, me amendamente për të rritur dhe thelluar më tej nivelin e liberalizimit të tregtisë së shërbimeve me Hong Kongun.
Lee tha se mezi pret të finalizojë tekstin për marrëveshjen e re sa më shpejt të jetë e mundur nga të dyja palët dhe të nënshkruajë dhe zbatojë zyrtarisht marrëveshjen pas përfundimit të procedurave përkatëse të miratimit të brendshëm.
Foto nga VCG
“I jam shumë mirënjohës qeverisë qendrore për mbështetjen e saj të fortë ndaj HKSAR”,- tha ai, duke shtuar se CEPA ka përforcuar rolin e Hong Kongut si një urë që lidh pjesën kontinentale dhe pjesën tjetër të botës dhe ka rritur konkurrencën e Hong Kongut.
Sipas tij, amendamentet e reja do të thellojnë më tej bashkëpunimin ekonomik dhe tregtar midis Kinës kontinentale dhe Hong Kongut dhe do të ofrojnë mundësi të mëdha biznesi.
Kina kontinentale dhe HKSAR nënshkruan marrëveshjen për tregtinë e shërbimeve sipas kornizës CEPA në nëntor 2015 për të arritur në thelb liberalizimin e tregtisë së shërbimeve.
Më pas, të dy palët nënshkruan në nëntor 2019 marrëveshjen për ndryshimin e marrëveshjes CEPA për tregtinë e shërbimeve për të liberalizuar më tej tregtinë e shërbimeve.
Foto nga VCG
Sipas kuadrit aktual të marrëveshjes CEPA për tregtinë e shërbimeve, pjesa kontinentale hap plotësisht ose pjesërisht 153 sektorë shërbimesh për industrinë e shërbimeve të Hong Kongut, duke u mundësuar ndërmarrjeve dhe profesionistëve të Hong Kongut të gëzojnë trajtim preferencial në zhvillimin e biznesit të tyre në Kinën kontinentale. (Elona)