Foto nga ATSH
Kryeministri Edi Rama deklaroi se të gjithë titujt e pronësisë që shpërndahen janë bazë për të ndërtuar një ekonomi familjare.
Gjatë dorëzimit të 789 titujve të pronësisë në Dhërmi, kryeministri Rama tha se shtëpitë e vjetra janë asete dhe do të jenë edhe bujtinat më të kërkuara nga turistët, shkruan “ATSH”.
“Për këtë arsye shtëpitë e vjetra janë baza, sepse shtëpitë e vjetra, ato që janë ndërtuar nga gjyshërit dhe stërgjyshit tanë këtu, janë asete. Të gjitha këto janë bujtina që do të jenë gjithmonë e më të kërkuara, sidomos tani me rritjen e fluksit të turistëve”,- deklaroi kreu i qeverisë shqiptare.
Sipas tij, të gjitha shtëpitë e kësaj zone janë bazë për të ndërtuar një ekonomi plus.
“Do të rritet më shumë edhe vlera e pronës dhe do të rritet më shumë edhe numri i turistëve që do të vijnë dhe patjetër do të rriten dhe më shumë të ardhurat e familjeve që jetojnë me turizmin”, tha kryeministri Rama. (Irma)