Foto nga VCG
Kina lëshoi mbi 2.86 milionë kredi hipotekore individuale me vlerë afro 1.5 trilionë juanë (rreth 211.01 miliardë dollarë amerikanë) nën programin e saj të fondit të ofrimit të strehimit në vitin 2023, duke përfituar një spektër më të gjerë njerëzish, treguan të dhënat zyrtare.
Mbi 76.2 milionë njerëz tërhoqën një total prej rreth 2.66 trilionë juanë nga fondi vitin e kaluar, sipas një raporti të publikuar bashkërisht nga Ministria e Financave, Ministria e Strehimit dhe Zhvillimit Urban-Rural dhe Banka Popullore e Kinës, shkruan “Xinhua”.
Kontributet në fond arritën në rreth 3.47 trilionë juanë, zbuloi raporti. Numri i subjekteve dhe personave që kontribuojnë në fond është rritur përkatësisht me 9.29 për qind dhe 2.8 për qind krahasuar me një vit më parë.
Foto nga VCG
Vitin e kaluar, shtatë qytete të tjera kineze iu shtuan listës së qyteteve pilot ku njerëzit e punësuar në mënyrë fleksibël lejohen të marrin pjesë në sistemin e fondit të sigurimeve të strehimit. Kjo i ndihmoi një grup të tillë njerëzish të punonin dhe të jetonin në mënyrë të qëndrueshme, sipas raportit.
Foto nga VCG
Kina gjithashtu ka rritur përpjekjet për të mbështetur të rinjtë në qytetet e mëdha që dëshirojnë të tërheqin fondin për të paguar qiranë. Më shumë se 18.46 milionë njerëz tërhoqën rreth 203.13 miliardë juanë për të paguar qiranë në vitin 2023, që përfaqëson respektivisht rritje prej 20.04 për qind dhe 33.52 për qind krahasuar me vitin e kaluar. (Irma)
