Foto nga VCG
Dhjetëra mijëra iranianë u mblodhën të martën për t'i dhënë lamtumirën presidentit Ebrahim Raisi dhe shtatë shoqëruesve të tij, që mbetën të vrarë të dielën nga përplasja e helikopterit me të cilin po fluturonin, shkruan “RTSH”.
Aksidenti ndodhi në malet e qytetit veriperëndimor të Tabrizit, ku zyrtarët po ktheheshin pas inaugurimit të një dige në kufi me Azerbajxhanin.
Forcat e Armatosura iraniane po hetojnë shkaqet e aksidentit.
Përveç presidentit Raisi humbën jetën edhe ministri i Jashtëm, Hossein Amir-Abdollahian, pjesëtarë të autoriteteve lokale dhe ekipi i sigurisë i presidentit.
Ceremonisë funebre iu bashkuan edhe qytetarët me flamuj dhe portrete të presidentit të ndjerë 63-vjeçar.
Kjo ishte dita e dytë e zisë nga pesë ditë të shpallura nga udhëheqësi suprem i vendit, ajatollahu Ali Khamenei.
Arkivolet u transportuan në qytetin qendror të Komit, i cili ka një domethënie të madhe fetare, ndërsa sot është parashikuar ceremonia më e madhe në Teheran, në praninë edhe të liderit Khamenei dhe personalitete të huaja.
Varrimi i Raisit në qytetin e shenjtë të Mashadit është planifikuar për ditën e enjte.
Lideri suprem ajatollah Ali Kamenei ka caktuar zëvendëspresidentin Mohammad Mokhber për të marrë drejtimin e qeverisë deri në zgjedhjet e reja. (Elona)