Ushtare ukrainas (Foto Msn)

Qeveria ukrainase ka pezulluar lëshimin dhe rinovimin e pasaportave për burrat e moshës ushtarake jashtë shtetit, njoftoi gazeta ukrainase “Ukrayinska Pravda”, citon “Xinhua”.

Sipas një dekreti të qeverisë, meshkujt ukrainas të moshës 18 deri në 60 vjeç, të cilët kanë të drejtë për shërbimin ushtarak, tani mund të marrin pasaporta ukrainase vetëm brenda Ukrainës.

Rregullat e reja, të cilat janë të vlefshme deri më 18 maj, nuk zbatohen për burrat ukrainas që lejohen të kalojnë kufirin ukrainas gjatë gjendjes ushtarake.

Më parë, burrat ukrainas lejoheshin të merrnin dokumente identiteti në ambasadat e Ukrainës dhe nga Shërbimi Shtetëror i Pasaportave të Emigracionit.

Në fillim të këtij muaji, presidenti ukrainas Volodymyr Zelensky nënshkroi një ligj për të shtrënguar rregullat e mobilizimit ushtarak, i cili prezanton disa dënime për shmangësit, duke përfshirë kufizime në shërbimet konsullore.

Sipas Eurostatit, deri në janar 2024, rreth 4.3 milionë ukrainas jetojnë në vendet e Bashkimit Evropian, duke përfshirë 860.000 burra të rritur. (Irma)