Mushkonja (Foto Panorama)

Ekspertët thonë se sëmundjet që transmetohen nga mushkonjat po përhapen në të gjithë globin, dhe veçanërisht në Europë, për shkak të prishjes së klimës.

Sipas tyre, insektet përhapin sëmundje të tilla si malaria dhe ethet e dengës, prevalenca e të cilave është rritur jashtëzakonisht gjatë 80 viteve të fundit, pasi ngrohja globale u ka dhënë atyre kushte më të ngrohta dhe më të lagështa për t’u përhapur, shkruan “Panorama”.

Profesoresha Rachel Lowe, e cila drejton grupin global të elasticitetit shëndetësor në Qendrën Superkompjuterike të Barcelonës, në Spanjë, ka paralajmëruar se gjatë dekadave të ardhshme shpërthimet e sëmundjeve të shkaktuara nga mushkonjat do të përhapen në pjesët aktualisht të paprekura të Evropës veriore, Azisë, Amerikës së Veriut dhe Australisë.

“Ngrohja globale, për shkak të ndryshimeve klimaterike, do të thotë që vektorët e sëmundjes që bartin dhe përhapin malarien dhe ethet e dengës mund të gjejnë vend në më shumë rajone, me shpërthime që ndodhin në zonat ku njerëzit ka të ngjarë të jenë imunologjikisht naivë dhe sistemet e shëndetit publik të papërgatitur”,- tha Lowe.

Sipas saj, realiteti i zymtë është se stinët më të gjata të nxehta do të zgjerojnë dritaren sezonale për përhapjen e sëmundjeve të shkaktuara nga mushkonjat dhe do të favorizojnë shpërthime gjithnjë e më të shpeshta që janë gjithnjë e më komplekse për t’u trajtuar.

“Thatësirat dhe përmbytjet e lidhura me ndryshimin e klimës mund të çojnë në një transmetim më të madh të virusit, me ujin e ruajtur që ofron vende shtesë për shumimin e mushkonjave”,- tha ajo, duke shtuar se nëse trajektorja aktuale e emetimeve të larta të karbonit dhe rritjes së popullsisë vazhdon, numri i njerëzve që jetojnë në zona me sëmundje të shkaktuara nga mushkonjat do të dyfishohej në 4.7 miliardë deri në fund të shekullit. (Irma)