Kina lëshoi raketën e saj “Gravity-1” nga një platformë e lëvizshme detare në brigjet e qytetit Haiyang të provincës Shandong të Kinës Lindore, 11 janar 2024. / CFP
Kina njoftoi në Ditën e saj të Hapësirës (24 prill) se anija kozmike me ekuipazh “Shenzhou-18” do të niset të enjten, ndërsa parashikohen të bëhen rreth 100 misione të nisjes në hapësirë sivjet, duke vendosur një rekord të ri në historinë e eksplorimit hapësinor nga ana e Kinës.
Duke filluar nga viti 2016, 24 prilli kremtohet si Dita e Hapësirës e Kinës për të shënuar nisjen e satelitit të parë kinez “Dongfanghong-1” në hapësirë më 24 prill 1970. Kina kreu 67 misione të nisjes në hapësirë vitin e kaluar, duke u renditur e dyta në botë pas Shteteve të Bashkuara, dhe dërgoi 221 anije kozmike në hapësirë, duke planifikuar të bëjë rreth 100 misione lëshimi në hapësirë këtë vit.
Nisjet përfshijnë fluturimin e parë nga vendi i parë i lëshimeve komerciale të anijeve kozmike të Kinës, i cili tani është në ndërtim në qytetin Wenchang në provincën ishullore jugore kineze Hainan, përveç më shumë lëshimeve satelitore për të formuar konstelacione.
Astronautë kinezë takohen në stacionin hapësinor të Kinës "Tiangong"(Foto:VCG)
Pamja e Tokës e xhiruar me kamerën e pajisur në stacionoin hapësinor të Kinës(Foto:VCG)
Në gjysmën e parë të këtij viti, Kina nisi “Queqiao-2”, një satelit rele komunikimi midis anës së pasme të Hënës e Tokës, dhe planifikon të lëshojë sondën hënore “Chang'e-6”, një mision për të mbledhur mostra nga ana e pasme e Hënës, e para e këtij lloji në historinë njerëzore.
Instrumentet shkencore nga Franca, Italia dhe Agjencia Evropiane e Hapësirës/Suedia do të jenë në bordin e mjetit zbritës të misionit “Chang'e-6”, me një ngarkesë të Pakistanit në orbitues, sipas Administratës Kombëtare Hapësinore të Kinës. Një satelit gjurmimi për kripësinë e oqeaneve, një satelit monitorimi elektromagnetik dhe një sondë astronomike e krijuar bashkërisht nga Kina e Franca janë gjithashtu në listën e detyrave të Korporatës së Shkencës dhe Teknologjisë Hapësinore të Kinës.
Në Ditën e Hapësirës të këtij viti, Administrata Kombëtare Hapësinore e Kinës (CNSA) deklaroi gjithashtu se më shumë partnerë, duke përfshirë një vend e dy organizata ndërkombëtare, do të marrin pjesë në ndërtimin dhe funksionimin e Stacionit Ndërkombëtar të Kërkimeve Hënore (ILRS).
Sonda kineze zbret në Mars, 2021(Foto:VCG)
Partnerët e rinj të ILRS-së përfshijnë Nikaraguan, Organizatën e Bashkëpunimit Hapësinor të Azi-Paqësorit dhe Bashkimin Arab për Astronominë dhe Shkencat Hapësinore.
Ndërtimi i Stacionit Ndërkombëtar të Kërkimeve Hënore do të kryhet në tre faza dhe një model bazë i stacionit pritet të përfundojë deri rreth vitit 2030.(Artan)