foto nga CFP

Çmimet e naftës dhe arit janë ulur pasi autoritetet iraniane duket se kanë minimizuar raportet për një sulm nga Izraeli, shkruan ATSH. Nafta e papërpunuar Brent, standardi ndërkombëtar, ra pasi u rrit për një kohë të shkurtër në mbi 90 dollarë për fuçi, pasi u shfaqën raporte për një sulm.

Ari për pak kohë iu afrua një niveli rekord përpara se të vendosej nën 2 400 dollarë për ons. Ka shqetësime se një përkeqësim i konfliktit në Lindjen e Mesme mund të prishë furnizimet me naftë.

Investitorët kanë ndjekur nga afër reagimin e Izraelit ndaj sulmit të drejtpërdrejtë me dron dhe raketa të Iranit fundjavën e kaluar. Çmimet e naftës fillimisht ishin rritur me 3,5%.

Por, Brent më pas ra në rreth 87 dollarë për fuçi pasi media shtetërore iraniane pretendoi se nuk kishte “asnjë dëm” në provincën Isfahan, ku kishte raportime për shpërthime.

Rritjet e mprehta dhe të qëndrueshme të çmimeve të naftës rrezikojnë të nxisin inflacionin. Vendet varen shumë nga malli, i cili përdoret për të prodhuar lëndë djegëse si benzina dhe nafta.(Fatosi)