Ministri i Jashtem turk (Foto Rtsh)

Ministri i Jashtëm turk, Hakan Fidan, kritikoi kryeministrin izraelit, Benjamin Netanyahu, për përpjekjen për të tërhequr rajonin në luftë për të qëndruar në pushtet në vendin e tij, gjatë një konference të përbashkët shtypi me homologun nga Katari, sheikun Mohammed bin Abdulrahman Al Thani në Doha.

Duke vënë në dukje se Turqia u përpoq të mos përshkallëzonte tensionet midis Izraelit dhe Iranit përpara 13 prillit, Fidan tha se Ankaraja zyrtare u kërkoi të dyja palëve të vepronin me përmbajtje, shkruan “RTSH”. 

Ai tha gjithashtu se është thelbësore që vendet jashtë rajonit t'i qasen me qetësi çështjes dhe se vendet e rajonit nuk duan që palët e treta të sjellin konfliktet e tyre në këtë hapësirë gjeografike.

Fidan tha se sulmi i Iranit kundër Izraelit më 13 prill ka treguar se ligji ndërkombëtar është i detyrueshëm për të gjitha vendet dhe se çelësi për vendosjen dhe ruajtjen e paqes dhe stabilitetit në të gjithë globin është i mundur vetëm duke iu bindur ligjit ndërkombëtar.

Ai gjithashtu vuri në dukje se Turqia dhe Katari janë vazhdimisht në koordinim për përpjekjet për armëpushim në Gaza, pasi ai tha se viktimat e vetme në rajon janë banorët e Gazës.

Fidan tha se Turqia do të rrisë përpjekjet e saj për t'i dhënë fund luftës në Gaza, pasi ekzistonte një kërcënim "i vazhdueshëm" se konflikti do të përhapej në rajon. (Irma)