Gaza (Foto Rtsh)
Si pjesë e negociatave jo të drejtpërdrejta në luftën e Gazës, organizata islamike palestineze Hamas u ka paraqitur ndërmjetësuesve një kundërpropozim për lirimin e pengjeve.
“Kjo do të përfshinte vetëm lirimin e pengjeve izraelite në këmbim të të burgosurve palestinezë nga burgjet izraelite dhe një tërheqje graduale të trupave izraelite nga Rripi i Gazës pas një armëpushimi 42-ditor”, raportoi ”Haaretz” duke cituar burime palestineze dhe arabe, shkruan “ATSH”.
Hamasi kishte mohuar më parë një propozim kompromisi të SHBA-së për lirimin e 40 pengjeve në këmbim të 900 të burgosurve palestinezë gjatë një armëpushimi gjashtëjavor.
Sipas “Haaretz”, kundërpropozimi i Hamasit kërkon që ushtria izraelite të ndërpresë luftimet në një fazë fillestare gjashtë-javore dhe të tërhiqet nga qendrat urbane.
Në të njëjtën kohë, palestinezët e zhvendosur do të lejohen të kthehen në Rripin verior të Gazës.
Gjatë kësaj periudhe Hamasi do të kërkojë të gjithë pengjet në zonën e pushtuar dhe do të zbulojë se në çfarë kushtesh ndodhen.
Në një fazë të dytë, ushtria izraelite duhet të tërhiqet në territorin izraelit.
Vetëm atëherë do të fillonte shkëmbimi i pengjeve izraelite për të burgosurit palestinezë. (Fatosi)