Ambasadorja kineze në Shqipëri, Pang Chunxue, dhe kryetari i Bashkisë së Fierit, Armando Subashi, vizituan ambientet e kompanisë kineze në këtë zonë, “Bankers Petroleum Albania”, duke e konsideruar një biznes me rëndësi që po bën hapa të jashtëzakonshëm në sektorin e prodhimit të naftës në vend.
Takimi në Fier, ambasadorja kineze në Shqipëri (Foto Facebook Bankers Petroleum Albania)
Ambasadorja Pang vlerësoi rolin kryesor të kompanisë në zhvillimin e ekonomisë shqiptare. Duke vënë në dukje zbatimin e teknologjisë më të fundit për prodhimin e naftës, veçanërisht teknikat e injektimit me avull, ambasadorja Pang nënvizoi kontributin e rëndësishëm të kompanisë në peizazhin ekonomik të Shqipërisë, shkruan “Bankers” në një postim në “Facebook”.
Kryebashkiaku Armando Subashi theksoi ndikimin pozitiv të “Bankers Petroleum Albania” në rajonin e Fierit dhe shprehu aspiratat për të tërhequr investime të mëtejshme kineze, veçanërisht në sektorë si shëndetësia, teknologjia dhe inteligjenca artificiale.
Takimi në Fier i ambasadores kineze në Shqipëri (Foto Facebook Bankers Petroleum Albania)
“Pata kënaqësinë të prisja ambasadoren e Republikës Popullore të Kinës, Pang Chunxue, me të cilën biseduam për rritjen e bashkëpunimit mes bashkisë së Fierit dhe bashkive simotra të Kinës, me të cilat kemi marrëveshje binjakëzimi. Biseda u përqendrua në rritjen e bashkëpunimit në fushat ekonomike, teknologjike, mjekësore dhe në fushën e inteligjencës artificiale. Po aq e frytshme ishte edhe vizita që bëmë në ambientet e kompanisë “Bankers Petrol”, me të cilën bashkia e Fierit vazhdon të ketë marrëdhënie shumë të mira bashkëpunimi në financimet e ndryshme në ndihmë të komunitetit”,- shkroi ai në një postim në “Facebook”.
Takimi i ambasadores kineze në Shqipëri me punonjësit e Bankers (Foto Facebook Bankers Petroleum Albania)
Drejtori i përgjithshëm i “Bankers”, Huanqin Xiao, deklaroi se kompania këtë vit ka një vizion transformues, duke theksuar zbatimin e metodologjive inovative të prodhimit të naftës. Sipas tij, duke integruar teknologjinë e injektimit me avull krahas metodave konvencionale të nxjerrjes, “Bankers” ka arritur rezultate fillestare premtuese, me ritme prodhimi që arrijnë në 25 tonë në ditë në fazat e hershme të zbatimit.
Takimi në Bashkinë Fier i ambasadores kineze në Shqipëri (Foto Facebook Armando Subashi)
“Aktualisht përgjegjëse për mbi 85% të prodhimit total të naftës në Shqipëri dhe duke punësuar më shumë se 1500 individë, “Bankers Petroleum Albania” qëndron si një gur themeli i sektorit energjetik të vendit dhe tregues i bashkëpunimit të suksesshëm ndërkombëtar. Me një angazhim për përparimet e vazhdueshme teknologjike dhe rritjen e qëndrueshme, “Bankers” është gati të vijojë me trajektoren pozitive, duke rritur më tej ndikimin në ekonominë shqiptare dhe duke forcuar pozicionin e një lojtari kyç në industrinë e naftës në vend”,- shkruhet në njoftimin e kompanisë. (Irma)
