Kryeministri spanjoll, Pedro Sanchez / foto nga CFP
Kryeministri spanjoll, Pedro Sanchez, kërkoi nga Bashkimi Europian (BE) të rishqyrtojë marrëdhëniet me Izraelin nëse zbulohet se vendi po shkel ligjin ndërkombëtar dhe rezolutat e detyrueshme të Kombeve të Bashkuara (OKB), shkruan “ATSH”.
Sanchez tha në një intervistë për “Al Jazeera” se ka dyshime të qarta që Izrali po i shkel ato ligje dhe rezoluta.
Irlanda dhe Spanja në BE kanë kërkuar një diskutim të çështjes dhe pasi të përgatitet shpresojnë për një debat serioz në Komisionin e BE-së.
Sanchez u shpreh kritik ndaj luftës në Gaza dhe strategjisë së kryeministrit izraelit Benjamin Netanyahu për të arritur sigurinë përmes luftës dhe jo diplomacisë.
Ai theksoi se Spanja ka qenë e hapur për nevojën për një armëpushim dhe njohjen e shtetit të Palestinës për muaj të tërë dhe theksoi se një numër në rritje i vendeve të BE-së kanë filluar të miratojnë të njëjtin këndvështrim.
“Komuniteti ndërkombëtar në tërësi duhet të njohë anëtarësimin e plotë të Palestinës në sistemin e OKB-së dhe në mënyrë dypalëshe. Ky moment duhet të jetë i ndryshëm nga të tjerët që kemi parë gjatë shtatë dekadave të fundit”, tha ai. (Fatosi)