Papa dhe ministri Hasani (Foto RTSH)
Ministri i Jashtëm Igli Hasani, në emër të qeverisë dhe shtetit shqiptar, vlerësoi përpjekjet e papa Françeskut dhe të Kishës Katolike për të ruajtur paqen, stabilitetin dhe harmoninë midis komuniteteve fetare, kombeve dhe popujve në botë.
“Vlerësimi i thellë i shenjtërisë së tij për shembullin që Shqipëria i jep botës për solidaritetin njerëzor dhe vëllazërinë fetare vazhdon të jetë një frymëzim dhe dritë udhërrëfyese për përpjekjen e vazhdueshme të vendit për të qenë në anën e duhur të historisë”,- theksoi ministri Hasani.
Në takimin me papa Françeskun u vlerësua harmonia fetare në Shqipëri si një model shumë i mirë për të gjithë rajonin dhe jo vetëm, bën të ditur “RTSH”. Marrëdhëniet e Shqipërisë me Selinë e Shenjtë janë shumë të rëndësishme dhe shkojnë përtej marrëdhënieve institucionale.
Këtë vit mbushen 10 vjet nga vizita e papa Françeskut në Shqipëri, i cili zgjodhi te vizitonte Shqipërinë si vendin e parë në Europë pikërisht për dialogun ndërfetar midis besimeve të ndryshme. (Elona)