Foto:VCG
Mjekët pneumologë bëjnë të ditur se 302 persona u infektuan nga sëmundja e tuberkulozit vitin e shkuar në Shqipëri, ku më të prekurit ishin moshë e re aktive për punë dhe kryesisht me banim në Tiranë, infektimi më i lartë që pas vitit 2019.
Sipas mjekëve, zhdukja e kësaj sëmundje mbetet ende një sfidë pasi mes të personave të sëmurë ka ende stigmë e për pasojë përhapja e saj vijon, shkruan “RTSH”.
Pandemia sipas ekspertëve shfaqi forma më të zgjatura pulmonare ndërkohë që format e përsëritura u rritën ndjeshëm.
Pavarësisht se në 10 vitet e fundit ka pasur rënie të të infektuarve me tuberkuloz, sipas mjekëve kjo ka ndikim nga emigrimi i popullatës, ku edhe në këtë segment janë kapur raste.
Pjesa më e madhe e të prekurve nga tuberkulozi jetojnë në Tiranë dhe Durrës duke ngritur kështu një problem të madh për shëndetin publik.
Më të prekur janë meshkujt sesa femrat ndërsa protokollet e trajtimit janë përmirësuar ndjeshëm duke bërë që të ulet shumë edhe vdekshmëria nga kjo sëmundje.
Tuberkulozi është një sëmundje mikrobike që transmetohet nga njerëzit e sëmurë përmes frymëmarrjes, kollitjes dhe teshtitjes. (Irma)