Foto nga Shqiptarja.com

Kryeministri Edi Rama deklaroi të dielën se Shqipëria duhet të investojë më shumë për mbrojtjen, pasi ky është një angazhim që është marrë si vend i NATO-s, shkruan “ATSH”.

Duke folur në mbledhjen e Asamblesë Kombëtare të Partisë Socialiste në Durrës, kryeministri Rama u shpreh se rrethanat e krijuara e imponojnë këtë hap.

“Duhet bërë me mendësinë dhe me standardet e NATO-s, duke hapur kapitullin e investimeve të mëdha private në industrinë moderne ushtarake, siç kanë bërë të gjitha vendet e Aleancës dhe siç bëjnë të gjitha vendet që e shikojnë mbrojtjen si një prioritet”,- deklaroi Rama.

Ai theksoi se repartet ushtarake të harruara, bashkitë e zonave malore mund t’i kthejnë në asete për të kërkuar mbrapsht investime nga emigrantët e këtyre zonave në fushën e turizmit apo agroturizmit.

Rama përmendi një investimm prej 200 milionë euro në Portin e Limionit në Sarandë, i cili qysh në kohën e mbretit Zog ka pasur plan zhvillimi për Marinë turistike. (Fatosi)