Papa Francesku (Foto Vaticannews)
Ukraina duhet të ketë kurajë të ngrejë flamurin e bardhë dhe të negociojë për dhënien fund të konfliktit me Rusinë, deklaroi papa Françesku në një intervistë regjistruar muajin e shkuar nga transmetuesi zvicerian “RSI”, citon “RTSH”.
Në intervistë, e cila pritet të transmetohet e plotë më 20 mars, Ati i Shenjtë u pyet për mendimin e tij në lidhje me debatin mes atyre që thonë se Ukraina duhet të dorëzohet pasi nuk ka qenë e aftë të zmbrapsë forcat ruse dhe atyre që thonë se duke u dorëzuar, legjitimohen veprimet e më të fortit.
Në pyetje, intervistuesi përdori termin flamur i bardhë.
“Mendoj se më i forti është ai që shqyrton situatën, mendon për popullin e tij dhe ka kurajë të ngrejë flamurin e bardhë dhe të negociojë”,- u shpreh papa, duke shtuar se bisedimet duhet të zhvilloheshin me ndihmën e ndërkombëtarëve.
Zëdhënësi i Vatikanit, Matteo Bruni, deklaroi se papa kishte përdorur termin “flamur i bardhë” të paraqitur nga intervistuesi, për të treguar nevojën për të ndalur armiqësitë për të arritur një armëpushim me kurajën e negociatave.
“Mos kini drojë dhe turp nga bisedimet”,- u shpreh papa, i cili në pjesën e intervistës ku flitej për luftën mes Izraelit dhe Hamasit theksoi se të negociosh nuk do të thotë të dorëzohesh. (Fatosi)