Foto Rtsh

Kryeministri izraelit, Benjamin Netanyahu, deklaroi se do të vazhdohet me një ofensivë ushtarake në Rafah, pavarësisht paralajmërimit të presidentit amerikan Joe Biden se një gjë e tillë do të ishte një vijë e kuqe, njofton “RTSH”.

Zyrtarët izraelitë kishin paralajmëruar më parë se nëse pengjet e mbajtura në Gaza nuk do të ishin në shtëpi deri në fillim të Ramazanit, ata do të nisnin një ofensivë ushtarake në Rafah.

Netanyahu tha se operacioni në qytetin jugor nuk do të zgjasë më shumë se dy muaj, por nuk dha detaje mbi afatin kohor. Ai gjithashtu mohoi pretendimin e presidentit amerikan se ai po dëmton më shumë sesa po ndihmon Izraelin në dështimin për të kufizuar viktimat civile në Gaza.

Administrata amerikane nuk po parashikon që forcat izraelite të zgjerojnë menjëherë operacionet e tyre ushtarake në Rafah.

Shefi i Ndihmës i Kombeve të Bashkuara ka paralajmëruar se një pushtim tokësor në Rafah mund të çojë në një masakër. (Fatosi)