foto nga VCG
Robotët e teksteve dhe modelet gjuhësore të bazuara në inteligjencën artificiale (IA) priren të prodhojnë stereotipe gjinore, klishe raciste dhe përmbajtje homofobike, thuhet në një studim të organizatës së OKB-së, UNESCO.
Studimi analizoi mjetet e përpunimit të gjuhës natyrore mbi të cilat bazohen platformat më të zakonshme gjeneruese të inteligjencës artificiale për stereotipe dhe zbuloi se gratë ishin të lidhura me punët e shtëpisë deri në katër herë më shumë se burrat, shkruan “ATSH”.
Ato shpesh shoqërohen me terma të tillë si “shtëpi”, “familje” dhe “fëmijë”, ndërsa burrat priren të lidhen me termat “kompani”, “menaxher”, “rrogë” dhe “karrierë”.
foto nga VCG
Drejtoresha e përgjithshme e UNESCO-s, Audrey Azoulay, deklaroi se aplikacionet e reja të inteligjencës artificiale kanë fuqinë të formësojnë në mënyrë delikate perceptimet e miliona njerëzve, në mënyrë që edhe paragjykimet e vogla gjinore në përmbajtjen që gjenerojnë mund të përforcojnë ndjeshëm pabarazitë në botën reale.
UNESCO u bëri thirrje qeverive të krijojnë dhe zbatojnë korniza të qarta ligjore për të adresuar paragjykimet strukturore në aplikimet e inteligjencës artificiale.
foto nga VCG
Një pjesë e studimit mati diversitetin e përmbajtjes së gjeneruar nga inteligjenca artificiale në një kampion njerëzish nga gjini, orientime seksuale dhe prejardhje kulturore të ndryshme. Për ta bërë këtë, platformave iu kërkua të shkruanin një histori për secilin person.
Studimi zbuloi gjithashtu se modelet gjuhësore priren të prodhojnë përmbajtje negative për personat me orientime të ndryshme gjinore dhe grupet e caktuara etnike. (Irma)
