Besimi te shkenca (Foto Panorama)
Besimi te shkenca dhe shkencëtarët ishte në qendër të një studimi të afro 240 kërkuesve shkencorë nga vende të ndryshme të botës. Shqipëria renditet e fundit, krah Bolivisë dhe Kazakistanit, për besimin te shkencëtarët, shkruan “Panorama”.
Kërkuesja për Shqipërinë, Ani Bajrami, deklaroi se shkaqet lidhen me mangësitë në komunikimin e shkencëtarëve me publikun si dhe pjesëmarrjen e tyre të ulët në hartimin e politikave të ndryshme në vend me ndikim në jetën shoqërore.
Qytetarët në këtë studim janë shprehur se do të donin një ndikim më të madh të shkencëtarëve për uljen e varfërisë dhe përmirësimin e cilësisë së shëndetit.
Në një studim të drejtuar nga dy profesorë, dr. Viktoria Kologna dhe dr. Niels G. Mede, përkatësisht nga Universiteti i Harvardit dhe Zyrihut për besimin e publikut te shkenca dhe shkencëtarët, Shqipëria renditet e fundit për besimin te shkencëtarët. Studimi u shtri në 67 vende të botës dhe analizoi përgjigjet e afro 71 mijë e 500 individëve, ku me 1 pikë është vlerësimi më i ulët dhe 5 më i larti. Në rang botëror, besimi te shkencëtarët rezulton sipas këtij studimi 3.62.
Shqipëria renditet krah Bolivisë dhe Kazakistanit për besimin e ulët te shkencëtarët. Nivelin më të lartë e kanë Egjipti dhe India. (Irma)