Kuvendi i Shqiperise (Foto Rtsh)

Kuvendi i Shqipërisë miratoi me 77 me vota pro projektligjin “Për ratifikimin e protokollit, ndërmjet Këshillit të Ministrave të Republikës së Shqipërisë dhe qeverisë së Republikës Italiane, për forcimin e bashkëpunimit në fushën e emigracionit”, shkruan “ATSH”.

Votave të socialistëve iu bashkuan edhe deputetët e PDIU-së.

Kryeministri shqiptar, Edi Rama, dhe kryeministrja e Italisë, Giorgia Meloni, nënshkruan më 6 nëntor në Romë marrëveshjen për ndërtimin në Shqipëri të një qendre për strehimin e emigrantëve. Sipas marrëveshjes, qendra do të vendoset në Gjadër të Lezhës dhe do të ketë një kapacitet maksimal prej 3 mijë personash. Marrëveshja parashikon që të gjitha shpenzimet do të përballohen nga Italia, ndërsa pala italiane do të procedojë me kërkesat për azil.

Personat të cilëve nuk do t’u miratohet procedura e azilit do të riatdhesohen drejt vendeve të tyre, sipas marrëveshjeve dypalëshe që ka pala italiane me ato vende.

Kohëzgjatja e marrëveshjes do të jetë 5 vjet. (Irma)