Orban (Foto Rtsh)
Parlamenti hungarez mund të ratifikojë së shpejti anëtarësimin e Suedisë në NATO, kur të fillojë punimet për sesionin e pranverës më vonë këtë muaj, deklaroi kryeministri Viktor Orban, njofton “RTSH”.
“Është lajm i mirë që mosmarrëveshja jonë me Suedinë do të zgjidhet së shpejti. Po ndërmarrim hapa që me fillimin e sesionit pranveror të Parlamentit, më 26 shkurt, mund të ratifikojmë anëtarësimin e Suedisë në NATO”,- tha Orban.
Suedia aplikoi për anëtarësimin në NATO gati dy vite më parë, duke bërë kështu një ndryshim historik të politikave, pas nisjes së konfliktit Rusi-Ukrainë.
Hungaria është i vetmi vend i NATO-s që nuk ka ratifikuar ende anëtarësimin e Suedisë, një proces për të cilin duhet miratimi i të gjitha vendeve anëtare të NATO-s. Vonesa ka tensionuar marrëdhëniet me Shtetet e Bashkuara dhe ka krijuar shqetësim mes vendeve aleate.
Partia në pushtet e Viktor Orban, Fidesz, ka përmendur ato që i quan akuza të pabaza të Suedisë se ka dëmtuar demokracinë në Hungari, si arsyen përse është shtyrë ratifikimi. (Fatosi)