Guvernatori Sejko (Foto Rtsh)

Guvernatori i Bankës së Shqipërisë, Gent Sejko, deklaroi se me pranimin në sistemin SEPA, të gjitha bankat duhet të unifikojnë sistemin e tyre të shërbimeve financiare duke lehtësuar procesin për qytetarët dhe bizneset por edhe ulur kostot.

Gjatë takimit “Inovacioni në sistemin financiar”, ku ishin të pranishëm përfaqësues të sistemit bankar dhe të industrisë së re “Fintech”, guvernatori Sejko tha se bankat në Shqipëri kanë bërë tashmë sistemin e shlyerjes së pagave në euro duke kursyer miliona euro, kohë dhe duke hequr përdorimin e parave në dorë, shkruan “RTSH”.

“Në funksion të ligjit që kemi, Banka e Shqipërisë ka ndërtuar ligjin për shërbimin e pagesave janë bërë aktet nënligjore dhe janë dhënë licencat. Bankat duhet të bëjnë detyrimet ligjore dhe investimet që duhet bërë. Këtu përfiton e gjithë ekonomia. Kemi bërë sistemin e shlyerjes së pagesave në euro duke kursyer miliona dhe kohë dhe kemi hequr shumë “cash” nga qarkullimi. Bankat duhet të jenë pjesë e këtij procesi. Kemi dalë nga lista gri dhe jemi pranuar në sistemin SEPA. Implementimi i këtij sistemi do të thotë unifikim për të gjitha bankat për shërbimin e pagesave dhe transferatve”,- tha guvernatori Sejko.

SEPA është një sistem që mundëson ekzekutimin e transfertave në euro i përdorur brenda BE-së dhe disa vendeve të tjera që nuk janë pjesë e tij. Në këtë zonë, transferimet në euro bëhen në të njëjtat kushte brenda dhe jashtë vendit. (Irma)