Foto nga RTSH
Mësuesit, drejtuesit e shkollave dhe koordinatorët janë trajnuar në kuadër të përgatitjeve për pjesëmarrjen e Shqipërisë për herë të parë në sondazhin ndërkombëtar TALIS 2024, që është një vlerësim ndërkombëtar për mësimdhënien dhe nxënien.
Ministrja e Arsimit dhe Sportit, Ogerta Manastirliu, ndoqi nga afër procesin që u zhvillua në shkollën 9-vjeçare “1 Maji”, në Tiranë, ku zhvilloi dhe një takim me mësuesit, drejtorët dhe koordinatorët pjesëmarrës në këtë trajnim, shkruan “RTSH”.
“Shqipëria merr pjesë për herë të parë në një vlerësim ndërkombëtar për mësuesit, “Talis 2024”, një sondazh i realizuar nga OECD-ja, për të matur cilësinë e mësimdhënies. Besoj se ky trajnim ka një rëndësi të veçantë edhe për ju. Duam të masim cilësinë e mësimdhënies në vend dhe ky është një instrument i matjes, që duhet të na drejtojë ne, edhe në marrjen e vendimeve për rishikimin dhe ridizenjimin e programeve aktuale, por edhe për programe të reja”,- tha ministrja Manastirliu.
Ky sondazh, i cili zhvillohet çdo pesë vjet nga OECD-ja, ka për qëllim mbledhjen e të dhënave të rëndësishme për të ndihmuar vendet në zhvillimin e politikave arsimore dhe në përmirësimin e cilësisë së mësimdhënies.
Trajnimet janë organizuar nga strukturat e ASCAP-së dhe synojnë përgatitjen e mësuesve dhe drejtuesve të shkollave për të plotësuar instrumentet anketues të sondazhit.
Deri më tani, janë trajnuar mbi 3000 mësues dhe drejtues shkollash nga rajone të ndryshme të Shqipërisë, duke përfshirë Tiranën, Korçën, Durrësin, Lezhën, Fierin, Beratin, Shkodrën, Dibrën, Elbasanin, Pukën, Lushnjën dhe Kamzën. Këto trajnime janë pjesë e fazës së parë, e cila shtrihet në 280 shkolla 9-vjeçare në të gjithë vendin. Faza e parë e sesioneve informuese në të gjithë territorin ka filluar në datën 8 janar dhe do të vijojnë deri në datën 19 janar.
Pas kësaj faze të parë do të nisë faza e dytë dhe e tretë e trajnimeve, e cila do të përfshijë zgjedhjen e mësuesve që do të trajnohen më tej për të marrë pjesë në vlerësimin “TALIS 2024".
Ky proces është sfidues, për të siguruar një sistem arsimor të përparuar dhe cilësor në Shqipëri, i cili fokusohet në rritjen profesionale të mësuesve dhe në përgatitjen e nxënësve për sfidat e së ardhmes. Sipas ministres Manastirliu, për arritjen e këtij qëllimi janë dhe programet kombëtare që po zhvillohen ndërkohë. (Irma)
